Një peticion i firmosur nga 216 psikologë në të gjithë vendin i është drejtuar qeverisë kundër Presidentes së Urdhrit të Psikologut, Valbona Treska, me argumentin se institucioni po kryen trajnime dhe akreditime që nuk janë miratuar nga Agjencia e Sigurimit të Cilësisë së Kujdesit Shëndetësor dhe Shoqëror.
Një prej firmtarëve është dhe Altin Nika, anëtar i këshillit të lartë të Urdhrit të Psikologut, i cili thotë se për këtë shqetësim ka pasur dhe një komunikim me portalin e bashkëqeverisjes.
“Urdhri i Psikologut po zhvillon trajnime edukimi në vazhdim, me kreditë, në një proces të ngjashëm dhe paralel, i cili sipas legjislacionit në fuqi, nuk është akredituar nga ASCK. Lidhur me detyrimin ligjor për akreditimin e trajnimeve, Urdhri i Psikologut nuk ka aplikuar në ASCK. Kjo ka sjellë paqartësi dhe kosto financiare në fushën e psikologëve”, shprehet Altin Nika, anëtar i Këshillit të Lartë të “Urdhrit të Psikologut”.
Sipas tij, trajnimet e kryera gjatë vitit të kaluara që kanë shkuar deri në 1500 euro, rezultojnë të pavlefshme ligjërisht.
“Qëndrimi i zotit Nika është mashtrim, tjetërsim i vullnetit dhe besimit të psikologëve. Kërkesa e ardhur sot nga një grup psikologësh ka në thelb uljen e tarifave. Nesër do të ketë një kallëzim në prokurori, lidhur me këtë deklaratë të pavërtetë dhe mënyrën e mbledhjes së firmave të këtij grupi psikologësh”, thotë Valbona Treska.
Psikologët kërkojnë shfuqizimin e vendimit për rritjen e tarifave të vendosura nga vetë “Urdhri i Psikologut”.
Top Channel
