Njëri prej autorëve të vjedhjes së dy personave gjatë orëve të para të mëngjesit në sheshin “Skënderbej” në Tiranë ka rënë në prangat e policisë, ndërsa është ende në arrati bashkëpunëtori i tij.
Ata u vodhën një shumë parash dy personave duke i kërcënuar me një pistoletë lodër.
Shërbimet e Sektorit të Forcës së Posaçme “Shqiponja”, në bashkëpunim me Komisariatin e Policisë Nr. 1, u njoftuan rreth orës 03:20 se në sheshin “Skënderbej”, dy persona të paidentifikuar nën kërcënimin e një arme, i kishin vjedhur një shumë parash dy personave dhe më pas ishin larguar.
Më pas në bulevardin “Dëshmorët e Kombit” u kap njëri prej autorëve të dyshuar, një 17-vjeçar, banues në Tiranë, ndërsa vijon puna për kapjen e 17-vjeçarit tjetër, bashkëpunëtor i tij.
Nga verifikimet e kryera ka rezultuar se dy të miturit, dyshohet se kanë grabitur një shume parash në një farmaci në rrugën “Asim Zeneli”.
Në cilësinë e provës materiale policia sekuestroi shumën e parave, pistoletën imituese dhe biçikletën që autorët përdorën për t’u larguar nga vendi i ngjarjes.
Sipas policisë, materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
Top Channel
