Putin e quan hero, kush është kanibali satanist që vrau dhe hëngri dy fëmijë

Nikolay Ogolobyak, 33 vjeç, është vlerësuar si hero nga presidenti rus. Ai ishte më i vjetri në mesin e një sekti satanistësh në Yaroslavl që u dënuan për krime groteske.

Satanistët vranë tre vajza dhe një djalë të moshës 16 deri në 17 vjeç pasi u përfshinë në flijime kafshësh dhe gërmuan varre njerëzish. Secili prej adoleshentëve u drogua dhe u godit 666 herë me kamë, u copëtua dhe më pas u gatuan në një zjarr në një ritual revoltues satanist të kryer gjatë dy netëve.

Kriminelët duke përfshirë Ogolobyak recituan një tekst satanist të gjetur në internet. Gjymtyrët, zemrat, skalpi, gjoksi dhe organet gjenitale të tyre u prenë dhe u gjetën në një gropë së bashku me trupin e një brejtësi të vogël të kryqëzuar në një kryq me kokë poshtë.

Anna Gorokhova, 16, Olga Pukhova, 15, Vavara Kuzmina, 16 dhe Andrei Sorokin, 16, u zhdukën në qershor 2008 dhe trupat e tyre u gjetën vetëm në mes të gushtit. Ata u shpallën viktima të ‘vrasjeve brutale ritualiste të fëmijëve’ nga një Gjykata ruse pas një hetimi penal dy vjeçar.

Ogolobyak u shpall fajtor për vrasjen e dy personave dhe për përdhosjen e trupave dhe varrimeve të të vdekurve dhe u dënua në vitin 2010 me 20 vjet në një koloni penale të sigurisë së lartë. Si rregull ai do lirohej në vitin 2028 në moshën 39-vjeçare, por Ogolobyak u regjistrua në luftën e Putinit me Ukrainën, duke menduar se nëse do të shërbente gjashtë muaj dhe do të shmangte vdekjen, ai do të ishte një njeri i lirë.

Një i dënuar mund të falet dhe lirohet vetëm me nënshkrimin personal të Putinit. Babai i Ogolobyak pranoi se djali i tij ishte plagosur në luftë dhe tani ishte i lirë.

“Është e vërtetë. Ai shërbeu atje për gjashtë muaj, por u plagos dhe tani është invalid. Ai mund të ecë, por plaga ishte e rëndë. Nuk ka gjasa që ta çojnë përsëri në luftë. Ai u kthye më 2 nëntor”, tha babai i Ogolobyak.

Satanistët e tjerë ishin nën 18 vjeç dhe u dënuan më pak. Konstantin Baranov dhe Alexander Voronov u mbyllën për dhjetë vjet në një koloni të regjimit të përgjithshëm, Alexey Solovyov dhe Alexey Chistyakov për nëntë vjet dhe Ksenia Kovalyova për tetë vjet.

Sergei Karpenko u dënua me dy vjet në një koloni penale dhe Anton Makovkin u diagnostikua me skizofreni dhe iu dha trajtimi i detyrueshëm psikiatrik.

Satanisti Ogolobyak, i cili mori dënimin më të gjatë të burgut, tani jeton me nënën e tij. Detajet e shërbimit të tij në luftë dhe plagosjes nuk janë bërë të ditura.

Lirimi i përdhunuesve dhe vrasësve pasi luftuan për Putinin po shkakton alarm në rritje në rajonet anembanë Rusisë. Deri më tani më shumë se 30 njerëz janë vrarë nga të dënuarit e të liruar nga burgu për të luftuar në luftë. Për të dënuarit që vdiqën, Putin tha: Ata dhanë jetën për Atdheun e tyre dhe shlyen për fajin e tyre.

Top Channel