Drejtoria e Përgjithshme e Shërbimeve të Transportit Rrugor ka nisur shqyrtimin e praktikës së suksesshme gjermane për të ulur moshën e marrjes së lejedrejtimit në 17 vjeç, me kusht shoqërimin gjatë drejtimit të mjetit nga një familjar me historik korrekt drejtimi mjeti.
Drejtori i DPSHTRR, Endri Haxhiu ka pritur në takim një delegacion gjerman për shkëmbimin e eksperiencave mbi përfitimin e lejeve të drejtimit në shtetet respektive. Pala Gjermane vlerësoi punën e DPSHTRR për praktikat e ndjekura dhe për risitë e masave për drejtuesit e rinj, në aspektin e rritjes së sigurisë në rrugë dhe impaktit në uljen e aksidenteve.
Takimi u finalizua me firmosjen e marrëveshjes mes dy shteteve për bashkëpunimin në aktivitete të forcimit të sigurisë rrugore dhe edukatës mbi trafikun dhe mënyrën e shfrytëzimit të rrugës!
“Mirëpritëm me kënaqësi të veçantë Z. Oliver Luksic, Sekretarin Parlamentar të Shtetit dhe Koordinatorin Federal për Logjistikën dhe Transportin e Mallrave në Gjermani, Z. Guido Zielke, Drejtor i Përgjithshëm i Trafikut Rrugor dhe Transportit të Ministrisë Federale Gjermane të Digjitalizimit dhe Transportit, si edhe Z. Sebastian Peter këshilltar i Z. Oliver Luksic.
Pas njohjes së konvertimit të patentave me shtetin Gjerman, takohemi sërish me kolegët tanë, për shkëmbimin e eksperiencave mbi përfitimin e lejeve të drejtimit në shtetet respektive, e ku ndër të tjera pala Gjermane vlerësoi punën e DPSHTRR për praktikat e ndjekura dhe për risitë e masave për drejtuesit e rinj, në aspektin e rritjes së sigurisë në rrugë dhe impaktit në uljen e aksidenteve. Me interes të veçantë u ndalëm në temën e praktikës pozitive gjermane për ta ulur moshën e marrjes së lejedrejtimit në 17 vjeç, me kusht shoqërimin gjatë ngarjes së mjetit nga një familjar me historik korrekt drejtimi mjeti, duke rritur orët në timon në kushte sigurie për shoferët e rinj, si edhe mbi temën e tarifave të Autoshkollave, ku ishim në një mendje se rregullimi nis nga garantimi i kostove dysheme dhe mbrojtja e tregut nga spekulimi e evazioni fiskal! Ramë dakort që të bashkëpunojmë për këto dy aspekte veçanërisht!
Gjithashtu, diskutuam edhe mbi Programet e Sigurisë Rrugore, eksperiencën mbi projekte të normave të sjelljes në qarkullim, ndihmë në ngritjen e sektorit shqiptar të Homologimit të mjeteve rrugore dhe për shkëmbimin e të dhënave mjete-drejtues mjetesh mes dy vendeve, trajnime e specializime specifike për përmirësime në praktika e shërbime, digjitalizim e harmonizim.
Takim ky, për t’u finalizuar me firmosjen e marrëveshjes mes dy shteteve për bashkëpunimin në aktivitete të forcimit të sigurisë rrugore dhe edukatës mbi trafikun dhe shfrytëzimit të rrugës!”- thuhet në njoftimin e Drejtorisë së Përgjithshme e Shërbimeve të Transportit Rrugor.
Vlen të theksohet se, pak kohë më parë një grup të rinjsh të moshës 15-16 vjeç ndërmorën një nismë të veçantë ku kërkonin uljen e moshës së lejuar për drejtimin e makinës nga 18 vjeç (siç parashikon ligji shqiptar) në 15 vjeç.
Ata nisën një peticion në change.org për mbledhjen e firmave, përmes së cilit kërkonin mbështetje për të bërë të mundur që të rishikohet ligji dhe t’u jepet e drejta ligjërisht të drejtojnë makinën që në moshën 15 vjeç.
Top Channel
