Zbardhet takimi i Rutte me Trump: Diskutuan sfidat e sigurisë globale me të cilat përballet aleanca 23/11 14:13
Koreja e Veriut lëshoi dy raketa balistike me rreze të shkurtër veprimi drejt bregdetit lindor të të mërkurën, njoftoi ushtria e Koresë së Jugut.
Lëshimi ndodhi vetëm disa orë pasi Shtetet e Bashkuara fluturuan të paktën një bombardues me rreze të gjatë veprimi, në Gadishullin Korean, në një shfaqje force ndaj Phenianit.
Shefat e Shtabit të Përgjithshëm të Koresë së Jugut thanë në një deklaratë se raketat u lëshuan të mërkurën vonë në mbrëmje nga kryeqyteti i Koresë së Veriut.
Në deklaratë thuhej se ushtria e Koresë së Jugut rriti gatishmërinë për mbikëqyrje në koordinim të ngushtë me Shtetet e Bashkuara.
Ministria e Mbrojtjes e Japonisë njoftoi gjithashtu se Koreja e Veriut kishte lëshuar të paktën një raketë që dyshohet të ishte balistike.
Më herët të mërkurën, Shtetet e Bashkuara fluturuan një bombardues B-1B në Gadishullin Korean, si pjesë e stërvitjeve në terren me Korenë e Jugut. Krahas kësaj Uashingtoni dhe Seuli po kryejnë një stërvitje vjetore të simuluar me kompjuter, të quajtur “Mburoja e Lirisë Ulchi”, e cila nisi më 21 gusht.
Koreja e Veriut i sheh stërvitjet ushtarake mes SHBA-ve dhe Koresë së Jugut, si sinjale për një sulm ndaj vendit.
Pheniani e sheh me shqetësim dislokimin e bombarduesve amerikanë B-1B, të cilët janë në gjendje të mbajnë një ngarkesë të madhe armësh konvencionale.
Dislokimi i së mërkurës i bombarduesit B-1B shënon fluturimin e 10-të të një bombarduesi amerikan në Gadishullin Korean këtë vit.
Ministria e Mbrojtjes e Koresë së Jugut tha se bombarduesi mori pjesë në stërvitje ajrore me avionë të tjerë luftarakë të SHBA-ve dhe Koresë së Jugut, në ujërat jashtë bregut perëndimor të Gadishullit Korean. Në deklaratë thuhej se stërvitjet demonstruan angazhimin e SHBA-ve për mbrojtjen e Koresë së Jugut.
Media shtetërore e Koresë së Veriut tha të martën se udhëheqësi Kim Jong Un bëri thirrje që ushtria të jetë vazhdimisht e gatshme për luftime për të penguar ato që i quajti, plane të rivalëve të saj për sulm. Gjithashtu të martën, Koreja e Jugut, SHBA dhe Japonia mobilizuan shkatërruesit detarë për një stërvitje trepalëshe të mbrojtjes raketore në ishullin jugor Jeju të Koresë së Jugut.
Top Channel
