Gjyqi ndaj Turmp në mesin e fushatës presidenciale, çfarë pritet të ndodhë

Avokatët e ish-presidentit Donald Trump u rikthyen të hënën në Washington, për të marrë pjesë në një seancë paraprake, në të cilën u përcaktua 4 marsi i vitit të ardhshëm si data kur do të nisë gjyqi lidhur me dyshimet se ai u përpoq të pengonte transferimin paqësor të pushtetit në 6 janar të vitit 2020, në Capitol.

Avokatët e Trumpit nuk pranuan të komentonin për Zërin e Amerikës, por u shprehën të zhgënjyer nga gjykatësja e çështjes Tanya Chutkan. Ata kishin propozuar që gjyqi të shtyhej deri në prill të 2026, pas zgjedhjeve presidenciale të nëntorit të vitit 2024. Prokurorët kishin kërkuar që gjyqi të niste më 2 janar të vitit tjetër, ndërsa juria të zgjidhej këtë dhjetor.

Eksperti Allan Lichtman i tha Zërit të Amerikës se ai beson se gjykatësja, Tanya Chutkan është një gjykatëse e fortë, që mori një vendim të zgjuar.

“Ajo renditi një sërë argumentesh të mira, që opinioni publik duhet të dijë, para zgjedhjeve nëse zoti Trump është apo jo fajtor mbi këto akuza vërtet serioze”, thotë Allan Lichtman, historian mbi presidentët dhe profesor në Universitetin Amerikan.

Një juri e madhe në Washtington votoi për të ngritur aktpadi ndaj Trumpit, përfshirë akuzat për komplot kundër Shteteve të Bashkuara dhe komplot për pengimin e drejtësisë. Trump është shprehur se është pafajshëm për këto akuza dhe ka pretenduar në mënyrë të vazhdueshme, pa dhënë prova, se akuzat ndaj tij janë të motivuara politikisht.

“Si mund të më çojë në gjyq kundërshtari im i korruptuar politik, Joe Biden, gjatë një fushate zgjedhore që unë po e kryesoj, duke më detyruar të shpenzoj kohë dhe para, për t’i bërë ballë akuzave të rreme”, është shprehur zoti Trump.

Trump ka deklaruar se akpatditë e ngritura ndaj tij kanë patur vetëm një ndikim, forcimin e mbështetjes në mesin e votuesve të tij. Por një nga kundërshtarët e tij në garën për të fituar emërimin e republikanëve, ish guvernatori i Arkansasit Asa Hutchinson, nuk bie dakord dhe thotë se nuk ka asnjë mundësi që zoti Trump të fitojë zgjedhjet presidenciale.

“Votuesit republikanë duhet ta kuptojnë se nuk mund t’i fitojnë zgjedhjet me Donald Trumpin. Prandaj e kam shtruar këtë çështje në mënyrë të drejpërdrejtë”, është shprehur zoti Hutchinson.

Shumë nga ngjarjet e 6 janarit të vitit 2020 patën mundësi t’i shohin të gjithë, thotë eksperti Licthman, duke e ekspozuar Trumpin ndaj mundësisë që të dënohet përpara zgjedhjeve presidenciale të vitit 2024.

“Po sikur Trump të burgoset, që nuk përjashtohet si mundësi. Teknikisht, ai mund të vazhdojë garën për president, por a do donin republikanët që kandidati i tyre të jetë një person që është dënuar për komplot kundër demokracisë sonë?, thotë eksperti Licthman.

Trump është ish-presidenti i parë amerikan që përballet me akuza penale. Ai po përballet me akuza edhe në tre çështje të tjera në New York, Xhorxhia dhe Florida.