Miliona përdorues të iPhone do të marrin një pagesë nga Apple, pasi kompania uli qëllimisht performancën e pajisjeve.
Marrëveshja buron nga padia e ‘batterygate’, e cila akuzoi kompaninë për frenim të fshehtë të modeleve të vjetra të iPhone. Në vitin 2017, përditësimi iOS 10.2.1 i Apple ndryshoi performancën e iPhone-ve të vjetër me bateri të konsumuara.
Kjo në mënyrë efektive nënkuptonte se bateria nuk funksiononte siç duhet, duke çuar në performancë më të ngadaltë në telefonat e lëshuar midis 2014 dhe 2016. Mënyra e vetme për të rivendosur performancën e plotë, ishte zëvendësimi i baterisë së konsumuar. Apple pretendoi se ishte bërë për të mbrojtur pajisjet nga mbylljet e papritura.
Megjithatë, duke qenë se kompania fillimisht nuk u tha klientëve se përditësimi po zvogëlonte performancën e modeleve të tyre të vjetra të iPhone, konsumatorët e indinjuar e paditën kompaninë.
Padia në grup, e paraqitur në dhjetor 2017, e përshkroi lëvizjen si “një nga mashtrimet më të mëdha të konsumatorëve në histori”. Kompania e teknologjisë mohoi të gjitha akuzat dhe hyri në një marrëveshje për të shmangur një proces gjyqësor të rëndë dhe të kushtueshëm. Marrëveshja nuk është një pranim i keqbërjes nga Apple, sipas Gjykatës së Qarkut të SHBA për Kaliforninë Veriore.
Si pjesë e marrëveshjes, Apple kishte rënë dakord të paguante 500 milionë dollarë për pronarët e prekur të iPhone dhe pagesat pritet të fillojnë së shpejti. Në fund të fundit, gjiganti i teknologjisë kërkoi falje për mungesën e komunikimit dhe uli çmimin e zëvendësimeve të baterive në 29 dollarë deri në fund të 2018.
Pronarëve të kualifikuar të iPhone do t’u duhej të paraqisnin një kërkesë në vitin 2020 dhe dorëzimet ishin të hapura deri më 6 tetor 2020. Ata që parashtruan një kërkesë në atë kohë, tani do të marrin një pagesë prej 65 dollarësh. Padia në grup ishte e hapur për klientët amerikanë që kishin një iPhone 6, 6 Plus, 6s, 6s Plus, 7, ose 7 Plus me iOS 10.2.1 ose iOS 11.2 përpara 21 dhjetorit 2017.
Top Channel
