![](https://top-channel.tv/wp-content/uploads/2024/09/MixCollage-07-Sep-2024-05-33-PM-5997-800x450.jpg)
Kompania eksploruese e skandalit thotë se ka mbyllur operacionet e saj “për një kohë të pakufizuar” pasi pesë milionerë humbën jetën kur nëndetësja e saj vetë-shpërtheu teksa udhëtonte drejt rrënojës së Titanikut.
Por tashmë 10 ditë pas tragjedisë ‘sensacionale’ operatorët e OceanGate duket se ende po reklamojnë udhëtimet e kushtueshme drejt rrënojës së Titanikut në faqen e tyre të internetit, siç shkruan rrjeti Independent.
Në faqen e tyre kompania e eksplorimeve nënujore thotë se planifikon dy udhëtime te rrënoja e Titanikut vitin që vjen, nga 12 deri në 20 qershor, si dhe nga 21 qershori deri në 29 qershor, me çmim të pandryshuar në $250,000, ku përfshihen kostot e zhytjes dhe qëndrimi në tokë.
Kompania shkruan se në ditën e parë pasagjerët vijnë në qytezën e St. John për t’u njohur me ekuipazhin dhe mjetin e zhytjes.
“Kjo do t’ju çojë te rrënoja e anijes RMS Titanic. Ju do të familiarizoheni me jetën në bordin e mjetit, për të nisur më pas udhëtimin 400-milje detare drejt rrënojës.”
Por dihet tashmë që këto udhëtime janë pezulluar për kohë “të pacaktuar”, pasi drejtori i kompanisë Stockton Rush, milioneri britanik Hamish Harding, eksperti francez i zhytjeve Paul-Henri Nargeolet dhe biznesmeni pakistanez Shahzada Dawood me të birin adoleshent Suleman vdiqën kur nëndetësja raportohet se vetë-shpërtheu gjatë udhëtimit të saj nënujor.
Por sipas rrjetit Independent, kompania po reklamonte gjithashtu një vend pune si nën-pilot, në kohën që kërkimet për viktimat e udhëtimit vijojnë. Më vonë njoftimi u hoq pas kritikave online.
Mbetje të copëtuara janë gjetur nga nëndetësja në ujërat e Kanadasë lindore, rreth 700 metra larg rrënojës së Titanikut, sipas raportimeve.
Top Channel