Raportuesja për Kosovën në Parlamentin Evropian, Viola von Cramon ka akuzuar presidentin e Serbisë, Aleksander Vuçiç për rrëmbimin e tre policëve kufitarë brenda territorit të Kosovës.
Ajo ka thënë se ai po e bënë këtë për të larguar vëmendjen nga kriza e brendshme politike në Serbi.
“Protestat e rrugës vendase të Vuçiçit në Beograd duket se janë një nga arsyet kryesore të trajtimit krejtësisht të tepruar dhe të papërshtatshëm të 3 rojeve kufitare nga Kosova. Sipas informacioneve në dispozicion, zyrtarët e Policisë Kufitare të Kosovës nuk kanë lëvizur me makinat e tyre… Edhe nëse ky operacion i nënshtrohet ligjërisht njoftimit, është e paligjshme të hysh në territorin e Kosovës me forcat speciale të policisë serbe dhe të lidhësh policët si kriminelë lufte, t’i çosh në Beograd”, ka thënë ajo.
Eurodeputetja ka theksuar se është e paligjshme hyrja në territorin e Kosovës me forca speciale, për të arrestuar policët.
“Çfarë bëjnë autokratët kur janë nën presion brenda vendit? Ata kërkojnë mënyra dhe mjete për të larguar vëmendjen nga problemet në shtëpi. Një rast klasik i kësaj duket të jetë incidenti i djeshëm në zonën kufitare mes Kosovës dhe Serbisë”, ka shkruar ajo.
Ajo ka kërkuar lirimin e shpejtë të policëve të Kosovës.
“Duke u përgatitur për t’u bërë anëtar i BE-së, Serbia duhet të ndjekë sundimin e Ligjit, respektoni ligjin, respektoni marrëveshjet dhe lironi policët sa më shpejt. Në rrjedhën e një de-përshkallëzimi të mëtejshëm, ndalimi i njëanshëm i importit nga Serbia i vendosur nga Kosova gjithashtu duhet të hiqet”, ka shkruar ajo.
Serbia po vazhdon t’i mbajë tre policë të Kosovës të cilët i ka rrëmbyer të mërkurën. Policia e Kosovës ka deklaruar se tre zyrtarët kufitarë janë rrëmbyer nga forcat serbe gjatë një patrullimi në vijën kufitare në veri të Kosovës derisa kanë qenë në detyrë, thellë brenda territorit të Kosovës, për të parandaluar shfrytëzimin e rrugëve ilegale.
Top Channel
