Kryeministri në mandat teknik i Malit të Zi, Dritan Abazoviç, ka mohuar akuzat se vota për anëtarësimin e Kosovës në Këshillin e Evropës nuk ishte “votë kundër Serbisë”, por për për të promovuar stabilitetin dhe bashkëpunimin rajonal.
Komisioni për Marrëdhënie Ndërkombëtare i Parlamentit të Malit të Zi kishte caktuar seancë dëgjimore të Abazoviçit, lidhur me mbështetjen e Kosovës për anëtarësim në Këshillin e Evropës – ku nga 46 shtete sa ka Këshilli i Evropës, 33 votuan për.
Kjo seancë ishte kërkuar nga deputetët e Frontit Demokratik pro-rus (DF), ata të Partisë Popullore Socialiste pro-serbe (SNP) dhe Demokratëve, me sugjerimin e kryetarit të Komisionit, Miodrag Leki, të cilët ishin të pakënaqur me votën e Malit të Zi.
DF-ja e quajti votën si “politikë të turpshme drejt Beogradi zyrtar”, ndërsa, gjatë seancës dëgjimore, anëtarë të kësaj partie thanë se vota e Malit të Zi ishte bërë “sipas urdhrit të SHBA-së”.
Por, Abazoviç tha se Mali i Zi e kishte njoftuar Beogradin zyrtar paraprakisht për votën për anëtarësim të Kosovës dhe shtoi se të gjithë zyrtarët e qeverisë paraprakisht kishin pranuar që Mali i Zi të ketë politikë të jashtme konsistente.
“Asgjë nuk ka ndryshuar në politikën e jashtme të Malit të Zi, ne kemi ndjekur një politikë të përgjegjshme dhe konsekuente dhe jemi sjellë si të gjitha vendet e tjera që e kanë njohur Kosovën”, tha Abazoviç gjatë seancën dëgjimore më 3 maj.
Ai tutje u thirr në marrëveshjen e Ohrit mes Kosovës dhe Serbisë, duke thënë se aty “shkruhet se njëri vend nuk do ta ndalë tjetrin nëse dëshiron të anëtarësohet në një organizatë të caktuar ndërkombëtare”.
“Unë i jap mbështetje të plotë liderëve të Serbisë dhe Kosovës për të gjetur një gjuhë të përbashkët së bashku me ndërmjetësit evropianë dhe palët e tjera”, tha Abazoviç.
Gjatë vizitës së tij të fundit në Kosovë, Abazoviç theksoi se Mali i Zi do të mbështesë integrimin e Kosovës në të gjitha organizatat ndërkombëtare dhe rajonale.
Podgorica zyrtare e njohu Kosovën si shtet të pavarur në vitin 2008, gjatë qeverisjes së Partisë Demokratike të Socialistëve (DPS) të Millo Gjukanoviçit, i cili u zëvendësua në gusht të vitit 2020 pas tre dekadash në pushtet.
Top Channel
