Bosnja përballë përmbytjeve vdekjeprurëse, ekipet ndërkombëtare të shpëtimit vijojnë kërkimet për personat e zhdukur 06/10 12:03
Aktualisht ka një pushim të luftimeve në Krime, por a është kjo një ngërç apo dy vendet po përgatiten për luftime të nxehta në fshehtësi?
Mund të duket sikur lufta në Ukrainë po rrëshqet nga radari i mediave botërore, duke lënë të kuptohet se ajo ka arritur në ngërç dhe është ndalur. Por pas titujve, të dyja palët janë jashtëzakonisht aktive.
Ofensiva “e hershme” e pranverës e Rusisë, e krijuar për të parandaluar ofensivën e Ukrainës të mbështetur nga Perëndimi, ka mbaruar me shpejtësi dhe nga çdo metrikë ushtarake ka qenë një dështim i tmerrshëm.
Putin e gjykoi këtë duke hedhur forcë dërrmuese në mbrojtjet ukrainase të lodhura nga beteja, por në vend të kësaj, ka humbur shumë trupa duke cenuar madje edhe radhët e forcave ushtarake të dislokuara.
Tani është koha që Ukraina të përfitojë plotësisht nga rraskapitja ruse dhe, me sa duket, skena është vendosur për një fazë potencialisht vendimtare të luftës. Larg vëmendjes mediatike, forcat ruse – kryesisht grupi Wagner – vazhdojnë të bëjnë përparim të ngadalshëm në Bakhmut me një luftë rrënuese.
Rënia e Bakhmut duket gjithnjë e më e pashmangshme – është raportuar se forcat ruse tani kontrollojnë mbi 85% të qytetit – por Ukraina i ka detyruar ata të paguajnë një çmim shumë të lartë për çdo centimetër përparim.
Moska mbetet e fokusuar në sigurimin e Donbasit dhe në veri në Luhansk, forcat nuk kanë kryer operacione sulmuese në shumë sektorë “për disa kohë” dhe duket se po konsolidojnë pozicionet e tyre. Ndërkaq, në centralin bërthamor të Zaporizhzhia, ata po vendosin pozicione luftimi me thasë rëre në çatitë e disa prej 6 ndërtesave të reaktorëve.
Lëvizje të tilla rrisin në mënyrë dramatike shanset e dëmtimit të sistemeve të sigurisë së uzinës, më tepër sesa nëse luftimet zhvillohen rreth zonës. Megjithatë, shanset për dëmtimin e reaktorëve në pikën ku mund të shkaktojnë një katastrofë natyrore janë të ulëta, sepse strukturat janë shumë të përforcuara.
Rusia ka zhvilluar gjithashtu mbrojtje të gjera lineare në rajonin Zaporizhzhia në Ukrainën jugore dhe tani ka përfunduar tre shtresa të zonave mbrojtëse në afërsisht 120 kilometra të rajonit, me llogore të dukshme nga hapësira. Përdorimi i gjerë i Dhëmbëve të Dragoit – pengesa antitank me formë katrore piramidale prej betoni të përforcuar të përdorura për herë të parë gjatë Luftës së Dytë Botërore për të penguar lëvizjen e tankeve dhe këmbësorisë së mekanizuar – plotëson linjat mbrojtëse.
Imazhet satelitore tregojnë se forcat ruse kanë transferuar automjete të blinduara dhe sisteme artilerie nga Krimea e pushtuar në vijën e frontit gjatë javës së kaluar.
Mirëpo, edhe ukrainasit kanë qenë gjithashtu të zënë.
Rreth Khersonit, ka raporte në rritje për krijimin e një linje të përkohshme me njësi ushtarake për mbrojtjen e zonave në disa plazhe ukrainase në bregun lindor të lumit Dnipro. Kjo, së bashku me një ritëm të shtuar të goditjeve të precizitetit të artilerisë kundër qendrave të furnizimit dhe logjistikës ruse, është një tregues i qartë se fazat e hershme të fazës sulmuese të Ukrainës tashmë janë duke u zhvilluar.
Tanket kryesore të betejës perëndimore – Leopard 2 , Challenge 2 dhe Abrams – vazhdojnë të rrjedhin në Ukrainë për t’u përshtatur me ekuipazhet e trajnuar ukrainas, me NATO-n që kohët e fundit deklaroi se “më shumë se 98% e mjeteve luftarake të premtuara Ukrainës janë dorëzuar”.
Përveç kësaj, 14,000 trupa ukrainase janë kthyer deri më tani për të mbrojtur atdheun e tyre pasi kanë marrë trajnime në Mbretërinë e Bashkuar, dhe dhjetëra mijëra të tjerë janë trajnuar nga vende të tjera perëndimore.
Këto nuk janë veprime të një lufte në ngërç. Të dyja palët po përgatiten për raundin tjetër të luftës brutale. Cilido qoftë rezultati në fushën e betejës dhe kudo që të zhvendoset vija e frontit, viktimat dhe shkatërrimet do të përshkallëzohen. Përfundimisht, kjo do të ndalet, por pavarësisht nga përgjumja e dukshme në luftime, një stuhi po vjen./ Përgatiti në shqip: Top Channel
Top Channel
