Atentati në Don Bosko/ Gjendet një mjet i djegur dhe tre kallashnikovë në afërsi të Bubqit

Gazetarja e Top Channel Dorjana Bezat raporton se janë gjetur dhe tre armë zjarri kallashnikov, me të cilat dyshohet se u qëllua mbrëmë me breshëri plumbash drejt një lokali në Don Bosko, duke lënë të vrarë banakieren dhe plagosur pesë të tjerë.

“Rreth orës 08:00, në vendin e quajtur “Ura e Sulë Meres”, në territorin e fshatit Likmetaj, shërbimet e Policisë të Stacionit të Policisë Manzë, duke ushtruar kontroll në territor, për kapjen e autorëve të ngjarjes së ndodhur mbrëmjen e djeshme, në rrugën “Ananstas Shundi”, Don Bosko, Tiranë, kanë konstatuar të djegur plotësisht, një automjet tip “BMW”, brenda të cilit janë gjetur 3 armë zjarri automatike“, njofton policia.

Ngjarja që tronditi zonën të dielën në mbrëmje ndodhi rreth orës 21:05, në rrugën “Ananstas Shundi”, në lokalin në pronësi të Fatjon Muratit, person me precedent të theksuar kriminal.

Mure të çarë nga dhjetëra plumba, xhama të thyer dhe mobilje të shkatërruara… Pamjet që vijnë sot nga lokali në Don Bosko janë imazh i një masakre që shkaktoi një viktimë dhe la pesë të plagosur.

Banakierja e lokalit, Mimoza Paja, rreth 58 vjeç u qëllua për vdekje, ndërsa u plagosën Sahit Murati, Astrit Meraj, Emanuel Sala, Ermir Bejuku dhe Genc Shohalli.

Viktima Mimoza Paja

Me hidhërim ka njoftuar lajmin e vdekjes së nënës, djali i 60-vjeçares: “Mallkuar qofshin ato plumbat që i zbrazën në trupin tënd, qofsh e xhenetit mam”.

Ndërsa fqinjët e 58-vjeçares tregojnë për jetën e vështirë të së ndjerës, që mbylli sytë tragjikisht një natë ma parë.

“I ka vdekur burri. Ishte me qira, bënte tre punë. Ishte e sëmurë, ka tre vajza dhe një djalë. Ishte shumë varfër, ka vuajtur shumë. Mbesën që u plagosur e kishte shumë përzemër, ishte vajza e vajzës’, thotë një grua.

E lënduar ka mbetur dhe mbesa 10-vjeçare e Mimozës, që u dëmtua nga ciflat e xhamave pas të shtënave me armë.

Kush është Fatjon Murati?

Murati u dënua me arrest me burg, por masa iu zbut në arrest shtëpie. Megjithatë, sikurse gazetarja e Top Channel Dorjana Bezat raporton, Murati nuk ndodhet në banesë, teksa në lokalin e tij, autorë të paidentifikuar qëlluan me breshëri plumbash.

Murati u arrestua në fillim të shkurtit 2022, kur u kap në shoqërinë e Endrit Dokles.

Ai ishte shpallur në kërkim nga Policia e Tiranës, pasi ka rezultuar posedues i armëve të zjarrit të gjetura në një kompleks rezitencial në kryeqytet. Për këtë bazë armatimi ra në pranga dhe 25-vjeçari nga Laçi Kristian Gjini, ndërsa në ambientet e marra me qira nga ai u gjetën 7 armë zjarri, 4 silenciator, municione e sende të tjera të paligjshme.

Emri i Fatjon Muratit doli në skenë edhe pas vrasjes së 3-fishtë në mbikalimin e Fushë-Krujës më 17 korrik 2022, kur humbën jetën Blilant Martinaj, Dikler Vata e Besmir Hoxha. Prokuroria nxori një listë personash, mes të cilëve ishte dhe Fatjon Murati, si person që mund të kishte dijeni për ngjarjen.

Murati është ndaluar më parë nga autoritetet italiane, si i dyshuar për blerje të mallrave të vjedhura, posedim ilegal të armëve dhe të lëndëve narkotike.

Ndërkohë, disa ditë pasi u ndalua, me vendim gjykate, u sekuestruan pasuritë e paluajtshme me vlerë 5 milionë euro.

Top Channel