![](https://top-channel.tv/wp-content/uploads/2024/09/0-2024-09-07T190138.257-800x450.jpg)
Këto janë pamjet e një kamera sigurie në rrethrrotullimin e unazës lindore që ka kapur momentin fatal të aksidentit ku humbën jetën 3 të rinj në kryeqytet.
Mjeti ‘Audi’ që drejtohej nga 20-vjeçari Klevis Ruçaj hyn në rrethrrotullim me shpejtësi mbi 200 km në orë për pak sa godet një mjet tjetër në rrethrrotullim e më pas thyen barrierat anësore dhe bie mbi një automjet që po kalonte në autostradë.
Përplasja rezultoi fatale për 23-vjeçaren Sikela Përroi dhe për 22-vjeçaren Erisilda Abedinin. Pak orë më vonë në spital ndërroi jetë dhe 20 vjeçari të cilin ia mori jetën pasioni I tij për shpejtësinë.
Në këtë rrugë qe lidh Farkën me rrethrrotullimin e unazës lindore Klevis Ruçaj ishte kapur edhe me herët duke kryer gara shpejtësie dhe ishte ndëshkuar me gjobë por nuk ishte ndërgjegjësuar. Edhe pasditen e së enjtes në këtë aks ai ka lëvizur me shpejtësi e cila e nxori nga rruga. Për shkak të përplasjes së fortë barrierat u thyen dhe mjeti fluturoi më shumë se 50 metra duke rënë mbi një mjet tjetër që po udhëtonte drejt Elbasanit.
3 personat që ndodheshin në mjetin që ndodhej në nënkalim morën dëmtime të lehta dhe ndodhen jashtë rrezikut në spital. Për forcën goditëse të makinës Audi me barrierat e rrugës flet kjo mbetje metalike e cila ka fluturuar rreth 80 metra nga njëra anë e rrethit në tjetrën.
Shkaktari i aksidentit 20 vjeçari Klevis Ruçaj kishte pak më shumë se një vit që kishte marrë patentën megjithatë kishte treguar se ishte një përdorues i rrezikshëm rruge jo vetëm nga videot që hidhte në tik tok por edhe nga ndëshkimet që kishte marrë nga policia.
Në pak muaj ai ishte gjobitur 5 herë nga policia për përdorim celulari në drejtimin e mjetit, shkelje semafori si edhe shpejtësi në zonat urbane duke bërë gara me bashkëmoshatarët. Madje në një rast më 15 nëntor për këtë shkak ai u shoqërua në komisariatin e Farkës dhe mjeti Skoda që kishte në përdorim u bllokua.
Top Channel