BE i jep 80 milionë euro Maqedonisë së Veriut për të përballuar krizën energjitike

Ky fond do të shërbejë si ndihmë për konsumatorët familjarë, shkollat, kompanitë publike lidhur me shpenzimet e energjisë elektrike, përkatësisht për përballjen me masat anti-krizë të cilat do t’i ndërmarrë qeveria në Shkup.

Paketën prej 80 milionë euro e njoftoi Presidentja e Komisionit Evropian, Ursula von der Leyen gjatë një vizite në tetorin e vitit të kaluar në Shkup.

Ambasadori i Bashkimit Evropian në Maqedoninë e Veriut, David Geer tha se kjo paketë ndihme flet për premtimet dhe solidaritetin e BE-së jo vetëm për vendet anëtare të Bllokut por edhe ato të ardhshme “si vlerë e prekshme themelore”.

Ndihma është në kuadër të fondit prej një miliard euro që BE-ja ka premtuar për vendet e Ballkanit Perëndimor në mënyrë që popullësia e rajonit të përballojë problemet e shkaktuara nga kriza energjetike.

Autoritetet maqedonase janë shprehur mirënjohëse për premtimin e mbajtur të BE-së. Kryeministri Dimitar Kovaçevski bëri të ditur se qeveria ka parashikuar një shumë prej 225 milionë euro nga buxheti i saj për vitin 2023 për menaxhimin e krizës energjetike. Ai tha në një konferencë shtypi se qeveria e tij arriti të mundësojë furnizimin e qëndrueshëm me energji elektrike për konsumatorët familjarë dhe bizneset dhe bëri rritjen e prodhimit të kapacitetit vendor.

Zëvendës-kryeministri Bojan Mariçiç, i ngarkuar me Çështjet e Integrimit Evropian, tha se “kjo është më tepër se sa mbështetje financiare që ndihmon përshpejtimin e transformimit të shoqërisë dhe përgatitjen e Maqedonisë së Veriut për anëtarësim në familjen evropiane”.

Autoritetet maqedonase synojnë rritjen e efikasitetit energjetik të objekteve shëndetësore në pjesën më të madhe të qyteteve dhe përforcimin e rrjetit të shpërndarjes së energjisë elektrike në disa rajone të vendit me prodhimin e “energjisë së gjelbër”.

Kriza energjitike sikur se edhe në shkallë globale, ka ndikuar në ekonominë e Maqedonisë së Veriut. Vendi importon një pjesë të madhe të energjisë për nevojat e brendshme. Kriza ka bërë që të rriten çmimet jo vetëm të energjisë elektrike dhe gazit por edhe çmimet e produkteve ushqimore.

Top Channel