Dy persona janë vënë në pranga pasi në makinën që po lëviznin në zonën e ish-bllokut iu gjetën armë zjarri dhe kokainë.
Drejtuesi i mjetit 39-vjeçari Elis Xherahu dhe pasagjeri Erdit Tefhasani 31-vjeç u kapën në rrugën “Brigada 8”.
Shërbimet e policisë gjetën një armë zjarri pistoletë me një krehër, municion luftarak si dhe lëndë narkotike kokainë, të cilat u sekuestruan në cilësinë e provës materiale.
Materialet ndaj dy personave banues në Tiranë i kaluan Prokurorisë, për veprime të mëtejshme procedurale.
“Tiranë/Finalizohet nga Komisariati i Policisë Nr. 2, operacioni policor i koduar “Double”. Me armë zjarri pistoletë dhe kokainë, në automjet, kapen në flagrancë dhe vihen në pranga 2 shtetas. Sekuestrohen arma e zjarrit pistoletë, krehri me municion luftarak dhe një sasi kokaine. Shërbimet e Komisariatit të Policisë Nr. 2, në vijim të punës për evidentimin dhe goditjen e rasteve të armëmbajtjes pa leje, bazuar dhe në informacionet e siguruara përmes inteligjencës informative, për dy shtetas që lëviznin me armë zjarri në automjet, në zonën e Ish-bllokut, kanë organizuar dhe finalizuar me sukses operacionin policor të koduar “Double”. Gjatë operacionit, në rrugën “Brigada 8″, shërbimet e Policisë kanë lokalizuar dhe ndaluar automjetin me drejtues shtetasin E. Xh. dhe pasagjer shtetasin E. T. Gjatë kontrollit në këtë automjet, shërbimet e Policisë gjetën një armë zjarri pistoletë, me 1 krehër me municion luftarak, si dhe një sasi lënde të dyshuar narkotike kokainë, të cilat u sekuestruan në cilësinë e provës materiale. Në përfundim të veprimeve u arrestuan në flagrancë shtetasit E. Xh., 39 vjeç dhe E. T., 31 vjeç, të dy banues në Tiranë, dhe materialet i kaluan Prokurorisë, për veprime të mëtejshme procedurale”, sipas njoftimit të policisë.
Top Channel
