Gjykimi në Apel për ekstradimin e Faruk Ozer, bosit turk të kriptomonedhave Thodex është shtyrë sërish këtë të martë.
Këtë herë shtyrja e seancës u bë pasi avokati i Ozer ka deklaruar se do të paraqesë kërkesë për përjashtimin e gjyqtarit të vetëm të çështjes, Valbon Çekrezit. Ky gjyqtar po shqyrton në Apel çështjen e ekstradimit të themeluesit të platformës Thodex. Seancën e kaluar gjyqtari vendosi të gjobisë avokatin mbrojtës të Ozer për zvarritje të procesit gjyqësor dhe të kërkojë caktimin e një avokati kryesisht për mbrojtjen e shtetasit turk. Faruk Fatih Ozer e ankimoi në Apelin e Durrësit vendimin e gjykatës së Elbasanit për ekstradimin e tij drejt Turqisë. Më 17 nëntor të këtij viti, gjykata e rrethit gjyqësor Elbasan vendosi ekstradimin në Turqi të Ozerit, vendim ky që u ankimua menjëherë.
Sipas Ozer dhe mbrojtjes së tij, ekstradimi në Turqi rrezikon jetën e ish-bosit turk të kriptomonedhave.
Në fund të gushtit, ai u arrestua në Shqipëri për llogari të Turqisë ku akuzohet për veprat penale “Krijimi i organizatës kriminale” dhe “Mashtrimi me pasoja të rënda”. Ozer u shpall në kërkim ndërkombëtar pasi akuzohet se u largua nga vendi me afro 2 miliardë dollarë të përfituara përmes mashtrimit të mijëra përdoruesve të platformës së tij të kriptovalutës.
Top Channel
