Dy ton naftë kontrabandë është sekuestruar, ndërsa është vënë në pranga 47-vjeçari që e mbante në depozitën e banesës në Kashar.
Policia mori informacion në rrugë operative se një person tregtonte naftë të kontrabanduar, në banesën e tij, në Kashar dhe më pas organizuan dhe finalizuan operacionin policor të koduar “Diesel 3”.
47-vjeçari Alfred Hoxha e mbante naftën e kontrabanduar për ta shitur.
“Finalizohet operacioni policor i koduar “Diesel 3”. Operacioni, nga Seksioni për Hetimin e Krimit Ekonomik dhe Financiar në DVP Tiranë, në vijim të operacioneve të njëpasnjëshme policore ndaj kësaj veprimtarie kriminale. Specialistët e Seksionit për Hetimin e Krimit Ekonomik dhe Financiar të DVP Tiranë, në vijim të punës për parandalimin, evidentimin dhe goditjen e veprimtarisë kriminale në fushën e kontrabandës së mallrave, bazuar dhe në informacionet e marra në rrugë operative, se një shtetas tregtonte naftë të kontrabanduar, në banesën e tij, në Kashar, organizuan dhe finalizuan operacionin policor të koduar “Diesel 3”. Si rezultat i këtij operacioni u arrestua në flagrancë shtetasi A. H., 47 vjeç, banues në Kashar, pasi në ambientet e jashtme të banesës së tij u konstatua një depozitë metalike, e mbushur me 2000 litra naftë, të dyshuara të kontrabanduara. Nga veprimet hetimore ka rezultuar se 47-vjeçari e mbante naftën e kontrabanduar, me qëllim tregtimin e saj”, sipas policisë.
Sipas policisë, materialet i kaluan Prokurorisë, për veprime të mëtejshme procedurale.
Top Channel
