“Nga mik në armik”, analiza e DW: 25 vitet e rrugëtimit të Putinit, si ndryshoi marrëdhënia e tij me BE dhe NATO-n 25/12 13:01
Problemet energjetike të Evropës u përshkallëzuan të martën pasi punëtorët norvegjezë të naftës dhe gazit hynë në grevë, duke mbyllur tre fusha në Detin e Veriut dhe duke shkaktuar një rritje të menjëhershme të çmimeve të gazit natyror.
Kompania shtetërore norvegjeze e energjisë Equinor tha se kishte mbyllur fushat pasi disa nga punonjësit e saj dolën në grevë pas një mosmarrëveshje pagash.
Të tre fushat prodhojnë ekuivalentin e rreth 89,000 fuçi nafte në ditë, më shumë se 30% e së cilës është gaz natyror, tha Equinor në një deklaratë. Norvegjia ishte burimi i dytë më i madh i gazit natyror në Evropë vitin e kaluar, pas Rusisë, sipas të dhënave të Eurostat dhe ndërprerja vjen në një moment kritik për rajonin.
Çdo rënie e vazhdueshme e prodhimit të Norvegjisë mund t’i japë një goditje të madhe përpjekjeve për të rimbushur rezervat e gazit përpara dimrit, si dhe të rrisë rrezikun e një mungese të energjisë.
Gjermania, ekonomia më e madhe e rajonit, ka shpallur tashmë një “krizë gazi” dhe paralajmëroi se nuk mund të përjashtojë futjen e racionimit për të kaluar dimrin. Lajmet e grevës bënë që çmimet e gazit natyror të rriten me 5% në 172 euro për megavat orë, sipas të dhënave nga Exchange Intercontinental. Ky është çmimi më i lartë që nga fillimi i marsit në ditët pas pushtimit rus të Ukrainës.
Të mërkurën, punëtorët norvegjezë do të bëjnë sërish grevë, gjë që do të rezultojë në mbylljen e tre fushave të tjera, tha Equinor. Këto fusha prodhojnë ekuivalentin e rreth 330,000 fuçi nafte në ditë, nga të cilat pothuajse 80% është gaz natyror.
Një tjetër grevë është planifikuar për të shtunën, e cila sipas llogaritjeve të Reuters mund të mbyllë rreth një të katërtën e prodhimit të gazit të Norvegjisë dhe 15% të prodhimit të saj të naftës. Equinor tha se ndikimi i ditës së tretë të grevave “nuk është ende i qartë”.
Top Channel
