Pas sekuestrimit të një sasie prej 45,5 kg kokainë, që u gjet mbrëmjen e së mërkurës e fshehur në një konteiner frigoriferik me mish pule, policia e Durrësit ka arrestuar administratorin e kompanisë porositëse të mallit “Apetit Group” Arben Ferizin, një 30 vjeçar me banim në Prishtinë, dhe Egert Vargun, 39 vjeç banues në Tiranë, me detyrë agjent doganor.
Asnjë prej të arrestuarve mes të cilëve edhe vargu këshilltar bashkiak në tiranë, nuk e ka pranuar akuzën deri në këto momente.
Kompania ”Apetit group” qe operon në industrinë e përpunimit të mishit, kishte kontraktuar agjencinë doganore AG në portin e Durrësit për të kryer procedurat për ngarkesën me mish pule që ishte porositur në Brazil dhe kalonte tranzit nga Shqipëria drejt filialit të saj në Maqedoninë e Veriut.
Task forca që vepron në port ushtroi kontroll në kontenier, ku në brendësi të ngarkesës me mish pule u gjetën 40 pako me lëndë të dyshuar narkotike kokainë, me peshë 45 kg e 500 gramë. Pakot ishin të mbështjella me letra që kishin të stampuar personazhe të Gokut dhe Budës nga filmat e animuar.
Gjetja e drogës brenda kontenierit dhe jo në pjesën e jashtme të tij përforcon dyshimet se ngarkesa e paligjshme është futur në kontenier që në vendin e origjinës së mallit në Brazil, megjithatë hetimet e mëtejshme do të zbardhin më shumë detaje lidhur me këtë rast trafiku të mbetur në tentativë.
Konteineri frigoriferik kishte mbërritur me anije disa ditë më parë nga porti grek i Pireut.
Një muaj më parë një tjetër sasi kokaine, 59 kg, u kap në një anije me qymyr që vinte nga Kolumbia. Ndërkohë 3 vitet e fundit sasia e kokainës që ka tentuar të trafikohet nga porti i Durrësit i kalon 1,5 tonët.
Top Channel
