Në prag të protestës së 26 nëntorit, Berisha: Nesër do të kryejmë nderime në vendin ku u vra Martin Cani
24/11 20:58
Kreu i Grupit parlamentar të PS-së, Taulant Balla komentoi arrestimin e ish-kryebashkiakut të Vorës, Agim Kajmaku, i cili u prangos nga policia italiane para disa ditësh, pasi po qarkullonte me 20 kg kokainë.
Ai u shpreh se PS përshëndet të gjitha veprimet e organeve të drejtësisë, pasi ligji duhet të veprojë njësoj për këdo.
“Sa herë që ligji funksionon mbi këdo, PS përshëndet veprimet e organeve të drejtësisë. Ky është qëndrim i qartë i yni që s’bën dallim për askënd. Ligji duhet të godasë mbi këdo”, theksoi ai.
Ish-kryebashkiaku i Vorës, Agim Kajmaku ka rënë në prangat e policisë italiane nën akuzën e kultivimit të lëndëve narkotike.
Kajmaku është ndaluar në 27 maj, pasi u kap me 20 kg kokainë në zonën e San Benedetto del Tronto, së bashku me nipin e tij.
Droga, që u gjet e fshehur brenda disa vazo lulesh, nëse do të shitej, do të kapte vlerën e 1 mln euro.
Ish-kryebashkiaku, klient prej kohësh në një fidanishte të njohur nga Grottamare, pasi bleu bimët, bashkë me nipin shkuan në shtëpi. Policia që po i ndiqte kontrolloi banesën, por nuk gjeti gjurmë droge.
Kajmaku, para se të bëhej kryebashkiak i Vorës, merrej me biznesin e fidanëve, farërave dhe plehrave, me firmën e tij që quhej “Kajmaku shpk”.
Tashmë ai do të gjykohet nga prokuroria italiane. Por Kajmaku ka një historik të gjatë të përballjes me drejtësinë shqiptare.
Gjykata e Tiranës, në nëntor të vitit 2019, caktoi në mungesë, masën e arrestit me burg për Kajmakun, për veprat penale të falsifikimit të vulave, stampave ose i formularëve, falsifikimi i dokumenteve zyrtare dhe kryerja e funksionit pas dhënies fund të tij.
Komisioni Qendror i Zgjedhjeve i ndërpreu mandatin Kajmakut. Ai u shkarkua nga KQZ pasi u denoncua nga Partia Demokratike për fshehje të të shkruarës kriminale në Greqi atje ku rezulton se është arrestuar, hetuar e më pas dënuar në mungesë për përdorimin e monedhave të falsifikuara, pavarësisht se më pas u shpall i pafajshëm nga gjykata e Apelit të Janinës.
Kajmaku erdhi në krye të Bashkisë Vorës nga zgjedhjet lokale të 30 qershorit 2019, dhe dënimin në Greqi nën emrin Jorgo Tota, që mbante atëherë, nuk e deklaroi në formularin e dekriminalizimit.
Top Channel
