Në një kohë krize të ngritjes së çmimeve të produkteve, një biznes në Lushnjë, që prodhon “Made In Albania”, vitamina dhe ushqim për kafshët pengohet për të eksportuar jashtë Shqipërisë.
Pas 20 vitesh emigrim në Greqi, familja investoi në Shqipëri, por prej 4 vitesh e gjysmë po hasin në vështirësi burokratike.
Në Fiks Fare u ankua familja Kuqi bashkëshortët Arben dhe Malvina. Ata prej 20 vitesh kanë qenë emigrant në Greqi dhe pas eksperincës së punës që morën atje u rikthyen në vendin e tyre. Arbeni bashkë me kunatin e tij hapën një biznes familjar që prodhon vitamina për kafshët. Thotë se formulat i ka marrë në Greqi dhe është biznesi i vetëm i këtij lloji në Shqipëri.
Arbeni tregon se kunati i tij duroi vetëm 2 vite dhe iku sërish në Greqi, pas burokracive të vazhdueshme për të eksportuar prodhimin jashtë vendit. Në Greqi ai ka hapur po të njëjtin biznes dhe nuk ka asnjë burokraci me dokumentet që kërkon shoqërimi i mallit për eksport. Vetë Arbeni pohon se do të qëndrojë në Shqipëri, pavarësisht gjithçkaje, megjithëse s’ka asnjë ndihmë nga shteti. E shoqja Malvina është më skeptike, pasi në biznesin e tyre kanë klientë nga vende të ndryshme të botës, por burokracitë e shumta në plotësimin e dokumentacioneve e kanë stepur.
Ajo thotë se kanë lidhur kontrata me disa klientë në Sudan për të nisur ngarkesa me produkte në vendin afrikan. Malli ka shkuar prej ditësh dhe nga autoritetet sudaneze janë kërkuar dokumente shtesë, të cilat duhet të vulosen nga autoritetet shqiptare. Familja Kuqi ka bërë analizat përkatëse dhe i ka vulosur në Ministrinë e Jashtme të Shqipërisë dhe i kanë nisur në Egjipt, te Ambasada Shqiptare, pasi është i vetmja ambasadë në Afrikë. Por, ka hasur në burokraci, ku njëherë i thonë se s’merret ambasada me letra, njëherë i thonë se duhet të shkojë dikush të bëjë postierin.
Sipas Malvinës, askush nuk i ka thënë rrugën, pasi ata e kanë të pamundur të shkojnë në Egjipt dhe me pas në Sudan. Letrat, pasi të firmosen duhet të shkojnë te Ministria e Jashtme e Egjiptit për vulë dhe më pas te Ambasada e Sudanit në Egjipt. Por, letrat kanë ngelur në ambasadë, pasi diplomatët thonë se s’e kemi për detyrë t’i çojmë ne tek autoritetet përkatëse. Madje, kanë telefonuar ambasadorin shqiptar në Egjipt, i cili i ka thënë se “mos i bjerë mëe këtij numri”. “Tani nuk dimë çfarë të bëjmë s’dimë ku të përplasemi, të na thonë se ça pune bëjnë ambasadat kur s’merren me qytetarët?” shprehet ajo.
Fiks Fare kontaktoi në telefon edhe me ambasadorin shqiptar në Egjipt, z, Eduard Sulo. Ai pohon se ambasada nuk merret me letrat e bizneseve. Ai thotë se s’është kompetencë e ambasadës, por duhet të merret një person i autorizuar. Pyetjes së gazetarëve se përse i ka shkruar familjes Kuqi “mos i bini më këtij numri'”, në fillim e mohon dhe më pas thotë se i kam thënë t’i bien numrit tjetër të ambasadës. Numër që po prapë ambasadori e përdorë dhe e ka.
Në fund, pohon se e ka të pamundur që të bëjë këto veprime, pasi aktualisht është i vetmi diplomat në Egjipt! ” I thoni z. Kuqi që ky problem nuk ka zgjidhje” përfundon ambasadori. E nëse bizneset hasin të tilla probleme e burokraci me dokumentacionin dhe nuk kanë zgjidhje, automatikisht do të falimentojnë ose mbyllen.
Top Channel
