Një lëndë plasëse ka shpërthyer këtë mbrëmje në një biznes në Fushë-Krujë.
Policia njofton se rreth orës 22:05, në derën e dyqanit të Naim Stafukës është vendosur një sasi lënde plasëse. Nga shpërthimi ka vetëm dëmtim të derës së dyqanit.
Në vendin e ngjarjes ndodhet grupi hetimor dhe vijon punën për verifikimin e rrethanave të ngjarjes dhe zbulimin e autorëve.
Naim Stafuka është vëllai i Enver Stafukës, që në vitin 2015 u rrëmbye nga tre persona të maskuar në afërsi të banesës dhe që prej atëherë nuk dihet asgjë për të.
Vëllai i Naimit, Enver Stafuka u akuzua për vjedhjen në bashkëpunim të automjetit që u përdor në vrasjen e komisarit Dritan Lamaj, por gjykata e nxori të pafajshëm. 13 ditë më parë, në Nikël, iu bë një atentat dhe të akuzuarit tjetër për vjedhjen e mjetit që u përdor në vrasje, Gentjan Bejtja. Ai mbeti i plagosur në krah me armë zjarri, ndërsa automjeti i drejtuar prej tij doli jashtë rruge duke dëmtuar lehtë një tjetër anëtar të fisit Stafuka.
Top Channel
