Johnson: Anglia mund të përballojë rritjen e të infektuarve

Johnson kundërshton vendosjen e masave të rrepta të mbylljes në Angli, duke besuar se dhënia e një doze të tretë të vaksinës dhe kujdesi i popullatës do të mjaftonte për të frenuar valën e fundit të koronavirusit, përcjell Reuters.

Sot në Britaninë e Madhe janë regjistruar 218.724 raste të reja, që është një rekord i ri për numrin e të infektuarve rishtazi në një ditë. Johnson tha se ai u përmbahet masave brenda “Planit B” të prezantuar në Angli muajin e kaluar, të cilat përfshijnë mbajtjen e maskave në transportin publik dhe dyqanet, por nuk kufizojnë tubimet ose mbylljen e kompanive.

“Bashkë me masat e ‘Planit B’ që kemi futur para Krishtlindjes, kemi mundësinë ta kapërcejmë këtë valë omicroni pa e mbyllur sërish vendin tonë. Ne mund t’i mbajmë shkollat ​​dhe bizneset tona të hapura dhe mund të gjejmë një mënyrë për të jetuar me këtë virus,” tha Johnson.

Sipas tij, java e ardhshme do të jetë e mbushur me sfida. “Nuk mund t’i shmanget faktit që puna e disa shërbimeve do të ndërpritet për shkak të mungesës së stafit”, theksoi Johnson. Ai paralajmëroi se spitalet do të përballeshin me presion të konsiderueshëm në javët e ardhshme dhe njoftoi testimin e përditshëm për COVID-19 për 100.000 punëtorë kritikë.

Top Channel