Pushtimi rus, Ukraina ka humbur 40% të tokës që kontrollonte në rajonin Kursk të Rusisë 24/11 18:00
Gjermanisë do t’i mungojnë të paktën 180.000 punonjës në sektorin e kujdesit mjekësor deri në vitin 2030 dhe numri i qytetarëve të varur nga kujdesi i njerëzve të tjerë do të rritet në mbi gjashtë milionë, një milion më shumë se sa pritej, sipas një studimi të kryer nga Barmer Health Insurance në Berlin, të mërkurën.
“Nëse marrim parasysh numrin në rritje të njerëzve që kanë nevojë për kujdesin e dikujt tjetër dhe mungesën tashmë akute të kujdestarëve, mund të themi se Gjermania po shkon drejt një situate dramatike kur bëhet fjalë për sektorin e kujdesit mjekësor,” tha Christoph Straub, njëri nga drejtorët e sigurimeve shëndetësore të Barmer.
Deri në vitin 2030, rreth gjashtë milionë qytetarë do të jenë të varur nga kujdesi i njerëzve të tjerë, që është rreth një milion më shumë se shifra që është llogaritur deri më tani, sipas një studimi të Barmer. Kostoja e kujdesit për të tjerët mund të rritet nga 49 në 59 miliardë euro në vit.
Straub kërkon nga qeveria e re masa urgjente për ta bërë më tërheqës profesionin e kujdestarit. Ai gjithashtu vuri në dukje problemin e shumë kujdestarëve që lanë punën e tyre gjatë pandemisë. Presidenti i grupit parlamentar të Partisë së Majtë në Bundestag, Dietmar Bartsch, propozoi një program urgjent për kthimin e kujdestarëve në profesionin e tyre.
“Ky është një veprim i koordinuar në nivel federal që synon të bindë ish-kujdestarët që të kthehen në sektorin e vjetër,” tha Bartsch. Një politikan nga e majta sugjeroi që kushdo që vendos të ndërmarrë këtë hap, t’i jepet një prim pa taksa prej 10 mijë eurosh.
Ministri bavarez i Shëndetësisë Klaus Holetschek ka propozuar që stafi mjekësor në njësitë e kujdesit intensiv të dyfishohet gjatë pandemisë së koronavirusit dhe të përjashtohet nga tatimi mbi të ardhurat. Ai beson se kjo do të sillte edhe kthimin e atyre që i kanë kthyer shpinën këtij profesioni vitet e fundit.
Top Channel
