![](https://top-channel.tv/wp-content/uploads/2024/06/vlcsnap-2024-06-25-21h16m09s502-800x450.png)
Mes mazhorancën dhe opozitës nuk ka konsensus për Reformën Zgjedhore. Pak orë para nisjes se seancës plenare ku në rendin e ditës është parashikuar ngritja e komisionit të posaçëm parlamentar për Reformën Zgjedhore, Lulzim Basha njoftoi deputetët e tij se deri më tani nuk ka konsensus mes palëve.
Në mbledhjen me dyer te mbyllura kryetari i grupit demokrat, Alfred Rushaj ka sqaruar deputetët se nga komunikimi me mazhorancën nuk ka dakordësi për të përfshirë në punën e këtij komisioni ndryshimet kushtetuese që lidhen me sistemin zgjedhor.
“Ne e kemi të rëndësishme që të mos kufizohet objekti i punës së komisionit tek sistemi aktual, por të jemi të hapur me opsionet”, citohet t’u ketë thënë Rushaj deputeteve demokrat duke i paralajmëruar se në varësi të zhvillimeve deri në orën 17.00, do të ndërmerren hapat e lejuar nga rregullorja për qëndrimin e grupit.
Menjëherë pas këtij komunikimi Lulzim Basha mbylli mbledhjen duke mos lejuar asnjë diskutim jashtë rendit të ditës.
Top Channel