Ditën e sotme, kryeministri Edi Rama ka mbledhur kryesinë e partisë në selinë rozë. Sekretari i Përgjithshëm i Partisë Socialiste, Damian Gjiknuri ka folur për mediat pas mbledhjes duke thënë se PS është gati që sot të hyjë në garë për të fituar zgjedhjet e pjesshme lokale.
Për Partinë Socialiste pas publikimit të vendimit të Gjykatës Kushtetuese për zgjedhjet vendore të vitit 2019, do të pritej një datë nga ana e Metës brenda 45 ditësh.
“Ne gati jemi dhe për zgjedhje të pjesshme vendore nëse Presidenti i dekreton ato pas vendimit të Kushtetuese. Kjo është një çështje që pas zbardhjes së vendimit të Gjykatës Kushtetuese dhe mendoj që ajo nuk ka pse ta vonojë vendimin. Brenda 45 ditëve ai duhet të dekretojë zgjedhjet. Ne jemi gati. Qëllimi është pse ky fokus tek partia. PS ka fituar zgjedhje dhe konkurron për të fituar. Partia është fokusi kryesor dhe ajo konkurron në zgjedhje në çdo kohë”, – tha Gjiknuri.
Gjiknuri bëri me dije se fokusi i mbledhjes të ditës së sotme ishte për pjesën e organizimit dhe raportimin nga sekretarët në lidhje me punët e bëra. Përvec kësaj, u fol për strukturën digjitale, organizimin me të rinjtë dhe gratë dhe të gjithë procesin organizativ për ta kthyer PS në një forcë permanente të aftë nga pikëpamja elektorale jo vetëm në periudhat zgjedhore.
Sa i përket ngritjes së Komisionit për Reformën Zgjedhore, thotë se është gati të ulet në tryezë me PD pasi PS i ka gati propozimet.
“Komisioni i reformës zgjedhore ka qenë mbi partisan, pas marrjes së kërkesës së PD do të ngremë në parlament këtë komision. Ka një nevojë për bashkëpunim. PD dhe PS duhet të jenë pjesë e këtij komisioni. Ne kemi propozimet tona bazuar në rekomandimet e OSBE/ODIHR. Ne e bëmë me PD kur nuk ishin pjesë e parlamentit” – tha Gjiknuri.
Top Channel
