Një 40-vjeçar u kap me armë pa leje dhe drogë në banesën e tij në Korçë.
Policia njofton se në shtëpinë e shtetasit me iniciale O.E. u gjetën një armë zjarri tip automatik me një krëhër me 25 fishekë dhe një sasi lënde narkotike e llojit kanabis.
Njoftimi i policisë:
Shërbimet e Komisariatit të Policisë Korçë, në vijim të punës për goditjen e veprimtarisë kriminale në fushën e armëmbajtjes pa leje, prodhimit dhe shitjes së narkotikëve, si rezultat i kontrolleve të shtuara për rritjen e parametrave të sigurisë, në bazë të informacioneve të siguruara në rrugë policore se një shtetas posedonte armë dhe lëndë narkotike, kanë organizuar shërbimet dhe kanë ushtruar kontroll në banesën e të dyshuarit, në lagjen nr. 6, të qytetit të Korçës.
Forcat e Policisë, gjatë kontrollit në banesën e shtetasit O. E., kanë gjetur 1 armë zjarri tip automatik me një krëhër me 25 fishekë, si edhe një sasi me lëndë të dyshuar narkotike Cannabis Sativa, të cilat u sekuestruan në cilësinë e provës materiale.
Në përfundim të veprimeve specialistët për Hetimin e Krimeve në Komisariatin e Policisë Korçë, bënë arrestimin në flagrancë të shtetasit O. E., 40 vjeç.
Top Channel
