Gazetarja e Top Channel, Anila Hoxha ka rrëfyer në emisionin Open detaje të reja për ngjarjen që ka tronditur opinionin publik ditët e fundit.
Dy javë para se të dilte nga burgu, Elton Metaj ka marrë në telefon viktimën, Sabrina Bengajn duke e kërcënuar se do ta vriste kur të dilte nga qelia.
Sipas saj kjo vrasje nuk do të ndodhte nëse institucionet do të kryenin detyrën e tyre duke e mbajtur prapa hekurave.
Hoxha thekson se në vrasjen e 23-vjeçares kanë dorë institucionet e drejtësisë, ndërsa në dosjen e Metajt ka pikëpyetje të shumta.
“Unë do të dal nga burgu dhe do të të vras i ka thënë 2 javë pasi të dilte nga burgu i Zaharisë. Çështja nuk është ndjekur për një sërë rastesh neglizhente. Vetëm gjykata është përgjegjëse?! Nëse shikon dosjen e të tillë personazhesh, një sërë institucionesh janë bërë bashkë dhe të gjithë kanë dhënë kontribut për t’i dhënë lirinë. Përfshirë mjekë psikiatër, të cilët e panë si një person me probleme mendore. Po flasim për ata burra që ushtrojnë dhunë në familje. Që nga janari 380 burra të arrestuar për akuzën e dhunës në familje, dhunë ndaj grave, ndaj fëmijëve, ndaj prindërve. Ishte një divorc i papranuar, ky ishte thelbi i konfliktit të tyre, një fund historie që ai nuk ishte dakord”, tha Hoxha.
Viktima Sabrina Bengaj dhe autori Elton Metaj
Vrasja e Sabrina Bengajt, nënë e një vajze 3-vjeçare është njëra prej 14 grave të vrara nga bashkëshortët për vititn 2021.
Edhe pse me një urdhër mbrojtje, ajo nuk arriti që t’i shpëtonte makabritetit të 31-vjeçarit që u lirua nga Gjykata e Fierit.
Të irrituar nga mosfunksionimi i institucioneve, qytetarët në Tiranë dhe Fier kanë kërkuar ndryshim dhe drejtësi për të gjitha gratë e dhunuara në vendin tonë përmes protestave paqësore me pankarta në duar.
Top Channel
