Presidenti i Turqisë, Recep Tayyip Erdogan, tha sot se do të punojë për t’i sjellë Kosovës njohje të reja.
Siç raporton agjencia e lajmeve Reuters, Erdogan u tha medieve turke se shpreson se çështjen e njohjes ndërkombëtare të Kosovës do ta hapë në bisedimet me presidentin amerikan, Joe Biden, gjatë Asamblesë së Përgjithshme të Kombeve të Bashkuara, këtë vjeshtë.
Erdogan tha se do të propozojë një punë të përbashkët mbi këtë çështje, për të rritur numrin e vendeve që e njohin Kosovën.
Kosova ka shpallur pavarësinë në vitin 2008.
Sipas listës së publikuar në faqen e Ministrisë së Jashtme të Kosovës, janë 117 vende që e njohin pavarësinë.
Serbia, që nga viti 2017, thuhet po bën fushatë diplomatike për të penguar njohjen e Kosovës nga vende të tjera. Si pasojë e këtij lobimi, disa vende thuhet se i kanë ngrirë raportet e bashkëpunimit me Kosovën, raporton radio Evropa e Lirë.
Serbia, me Marrëveshjen e Uashingtonit të 4 shtatorit, 2020, ka marrë obligim që ta ndalë fushatën për tërheqjen e njohjeve të Kosovës, ndërsa Kosova ka marrë mbi vete obligimin që të mos aplikojë për anëtarësim në organizata ndërkombëtare për një vit.
Top Channel
