Politikë Të Fundit

Shkarkimi i Voltana Ademi si kryetare e shoqatës së Bashkive, vjen reagimi i saj i parë: Do të respektohet deri në fund vendimi i Gjykatës Kushtetuese

08/06/2021 14:53

Kryetarja e Bashkisë së Shkodrës, Voltana Ademi ka reaguar për vendimin e marrë në shoqatën e bashkive, në të cilën u vendos shkarkimi i saj nga posti drejtues dhe emërimi i Pjerin Ndreut.

Me anë të një statusi, Ademi thotë se eksponentët e PS tentuan të dëmtojnë demokracinë dhe pretendon se sot kishte tentativë për të kapur ilegalisht Shoqatën e Bashkive të Shqipërisë. Ndër të tjera thotë se Shoqata e Bashkive të Shqipërisë është e vendosur për të vijuar deri në fund duke shprehur vullnetin e saj për të respektuar ligjin dhe vendimin përfundimtar të Gjykatës Kushtetuese.

Reagimi i plotë

Shqyrtimi dhe vendimi për ligjshmërinë e zgjedhjeve lokale 2019, është një ndër 15 kushtet që Shqipëria duhet të përmbushë për çeljen e negociatave për anëtarësimin në BE, kushte të dakordësuara në takimin e Ministrave për Europën.

Ritheksojmë se Shoqata e Bashkive të Shqipërisë, shoqëria civile në Shqipëri, qytetarët shqiptarë, Shtetet e Bashkuara të Amerikës, Bashkimi Evropian, Këshilli i Evropës, të gjithë partnerët dhe organizatat ndërkombëtare, janë në pritje të vendimit të Gjykatës Kushtetuese.

Në Lezhën e Besëlidhjes, sot eksponentë të Partisë Socialistë tentuan të dëmtojnë Demokracinë. Sot pati një tentativë për të kapur ilegalisht Shoqatën e Bashkive të Shqipërisë, veprime te ndërmarra nga eksponentë, anëtarë të Partisë Socialiste, pa të drejta legjitime dhe jo anëtarë Shoqatës së Bashkive të Shqipërisë. Çdo veprim me prapavijë politike dhe arbitrare cënon hapur parimet e shtetit ligjor dhe demokracisë vendore.

Shoqata e Bashkive të Shqipërisë konsideron se demokracia lokale dhe sundimi i ligjit kanë rëndësi madhore për integrimin e vendit tonë. Shoqata e Bashkive të Shqipërisë është e vendosur për të vijuar deri në fund duke shprehur vullnetin e saj për të respektuar ligjin dhe vendimin përfundimtar të Gjykatës Kushtetuese.