U deshën 3 ditë kohë për të miratuar fletën e votimit që do të përdoret në zgjedhjet parlamentare të 25 Prillit.
Kryekomisioneri Ilirjan Celibashi suprizoi socialistët duke propozuar të njëjtën fletë votimi që kërkonte Partia Demokratike, ku kandidatët shënohen me emra. Pa u tharë mirë boja mazhoranca e ankimoi vendimin në KAS.
Për shkak të ndryshimeve si në ligjin zgjedhor ashtu edhe në Kushtetutë, për herë të parë në këto zgjedhje votuesit krahas partisë do të shprehin preferencën e tyre edhe për kandidatët Dukshëm fleta e votimit ndryshon nga ajo e zgjedhjeve të vitit 2017 si nga kompozimi ashtu edhe përmasat gjigante te saj.
Kjo është fleta e votimit në zgjedhjet e shkuara parlamentare, ku renditeshin vetëm 18 subjekte politike duke e bërë zgjedhjen e elektoratit edhe më të thjeshtë. Për shkak të situatës politike koalicionet ishin të pamundura, ndaj partitë e vogla ruajtën siglat e tyre në fletën e votimit. Votuesi kishte të drejtë të shënonte me kryq brenda kuadratit një parti politike dhe me pas i drejtohej kutisë së votimit.
Në fletën e votimit që do të përdoret në zgjedhjet e 25 prillit, renditen më pak parti politike, 12 gjithsej. Por, krahas subjekteve politike zgjedhësit duhet të shprehin preferencën edhe për 1 kandidat. Përzgjedhja më e vështirë duket në qarkun e Tiranës, me numrin më të madh të mandateve ku krahas 12 partive garon edhe një kandidat i pavarur, ndërkohë në fletën e votimit renditen 433 kandidatë gjithsej.
Listat pjesërisht të hapura prodhuan një format të ri koalicionesh duke bërë që shumë parti të vogla opozitare të humbin siglat në fletën e tyre të votimit dhe përfaqësohen me logon e PD. Ndërkohë krahas emrave zgjedhësit duket se do e konfuzojnë edhe logot e njëjta. Ku Partia Demokratike dhe Bindja e Astrit Patozit kanë shumë ngjashmëri prej tyre. Ky detaj ndryshoi kompozimin e kandidatëve në momentet e fundit, nga vertikalisht ne horizontalisht që dy partitë opozitare të kishin hapësira me njëra tjetrën.
Top Channel
