Ashtu siç ishte lajmëruar më parë ka nisur sot seanca disiplinore ndaj Enkeleida Hoxhës gjyqtarja, që njihet për vendimet ku shumë të dënuar janë liruar nga burgu. Ajo u arrestua nga SPAK më 11 shkurt, pasi akuzohet se me një skemë të ngritur së bashku me disa funksionar të tjerë në Gjykatën e Krujës, ulnin dënime dhe lironin të burgosur.
Artur Metani, kreu i Inspektoratit të Lartë të Drejtësisë i cili thekson kërkesën për shkarkimin e saj nga detyra tha se: Në përfundim të këtij procedimi disiplinor, si për sa i përket fakteve të provuara dhe pretendimeve të paraqitura nga ana e magjistrates, subjekt procedimi disiplinor, në cilësinë e Inspektorit të Lartë të Drejtësisë, përfundimisht vlerësoj se gjatë këtij procedimi disiplinor rezulton e provuar se:
– Nga ana e magjistrates Enkeleida Hoxha janë ndërmarrë veprime/mosveprime të cilat kanë të bëjmë me mosrespektim të rëndë dhe të vazhduar të legjislacionit material dhe procedural penal
– Nga ana e magjistrates Enkeleida Hoxha, nuk janë marrë prova vendimtare për zgjidhjen e çështjes duke cënuar parimin e paanësisë së gjykimit
– Nga ana e magjistrates Enkeleida Hoxha i është atribuar dhënia e cilësive të ndryshme, herë si i paraburgosur dhe herë si i dënuar, gjatë periudhave të njëjta në funksion të pranimit të çdo kërkese të paraqitur nga ana e të njëjtit kërkues;
– Nga ana e magjistrates është aplikuar ulja e njëkohshme e dënimit për periudha më të gjata se periudha 12 mujore e vlerësimit të parashikuar në Ligjin nr. 8328/2008 “Për të drejtat dhe trajtimin e të dënuarve dhe të paraburgosurve”, i ndryshuar.
– Nga ana e magjistrates nuk janë respektuar kriteret ndaluese për përfitim amnistie
– Në 5 procese gjyqësore është konstatuar një mungesë thelbësore në arsyetimin e vendimeve gjyqësore
– arrihet në konkluzionin se veprimet/mosveprimet e ndërmarra nga ana e magjistrates Enkeleida Hoxha janë aq serioze sa kanë cenuar vlerat themelore të saj; besimin që magjistrati duhet të përcjellë te publiku në përmbushjen e misionit dhe rolit të tij në dhënien e drejtësisë; kanë diskretituar rëndë figurën dhe pozitën e gjyqtarit dhe kanë ulur dinjitetin e organit që përfaqëson duke e bërë atë të pa denjë për vazhdimin e ushtrimit të funksionit të magjistratit.
kërkojmë nga Këshilli i Lartë Gjyqësor:
Të administrojë provat e paraqitura nga ana e Inspektorit të Lartë të Drejtësisë në këtë procedim disiplinor
Të pranojë kërkesën e Inspektorit të Lartë të Drejtësisë për fillimin e procedimit disiplinor ndaj magjistrates Enkeleida Hoxha, me detyrë gjyqtare pranë Gjykatës së Rrethit Gjyqësor Krujë për shkeljet disiplinore të parashikuara nga neni 140, pika 2, shkronja “a” e Kushtetutës së Republikës së Shqipërisë dhe nga neni 102, pika 1 shkronjat “ç” dhe “dh” dhe neni 102, pika 2, shkronjat “a” dhe “c”, të Ligjit nr. 96/2016 “Për statusin e gjyqtarëve dhe të prokurorëve në Republikën e Shqipërisë”, të ndryshuar dhe caktimin ndaj saj të masës disiplinore “Shkarkim nga detyra”.
Gjykata e Posaçme e Shkallës së Parë Për Korrupsionin dhe Krimin e Organizuar ka caktuar më herët masën e sigurisë arrest në burg për shtetasen Enkelejda Hoxha, gjyqtare në Gjykatën e Rrethit Gjyqësor Krujë, e dyshuar për veprën penale penale “Korrupsioni pasiv i gjyqtarëve, prokurorëve dhe funksionarëve të tjerë të drejtësisë”, kryer në bashkëpunim.
Ndërkohë Avokati Vishaj është shprehur : Për mua një gjyqtar nuk mund të hiqet për një kazus. Rasti Billa e pranoj se ka shkelje për llogaritjen e viteve të dënimit por jo një kazus për shkarkim.
Metani: Padyshim që avokati dhe magjistratja kanë të drejtë të mbrohen por duke u fokusuar tek çështjet e raportit disiplinor. Dua të fokusohem tek përpjekjet e avokatit për të bërë pis këtë proces. Unë që në daljen e parë publike mes 8 shkurt 2020 kam paraqitur si prioritet inspektimet tematike nëpër gjykata për lirimet me kusht. Dhe këtë e kemi bërë me burimet e kufizuara njerëzore që ka pasur ILD dhe vijon marrja e informacioneve nga gjykatat. Kjo është procedura ligjore. ILD në ushtrimin e detyrës së vetë nuk mund të jetë paragjykues ndaj të dhënave që publikojnë mediat. Është detyrë e ILD të verifikojë këto fakte dhe magjistratja Enkeleda Hoxha është njohur me veprimet e hetimit disiplinor çdo herë. Avokati duhet të lexojë me vëmendje raportin se aty janë të gjitha përgjigjet e çështjeve që po ngre.
KLGJ pasi dëgjoi konkluzionet e palëve vendosi që shpallja e vendimit do bëhet më dt 17 mars ora 10
Top Channel
