Në Universitetin e Tiranës është krijuar një situatë konfuze për procesin zgjedhor.
Rektori aktual Mynyr Koni me anë të një shkrese drejtuar ministres së arsimit thotë se zgjedhjet nuk mund të zhvillohen, pasi nuk e njeh Komisionin Zgjedhor të 2016-ës dhe nuk ka pasur regjistrim kandidatësh për një komision të ri. Nga ana tjetër, studentët zhvilluan dy muaj pasi nisën betejën ligjore seancën.
“Gjykata administrative e shkallës së parë në Tiranë, nuk mori vendim për padinë që qëndresa qytetare me studentët patën në lidhje me pezullimin e procesit zgjedhor në Universitetin e Tiranës”.
“Sot gjykata mori një vendim që ishte shumë i çuditshëm duke vendosur që të mos marr vendim por do ta shqyrtojë çështjen në themel në datën 18 shtator 2020 kur në fakt zgjedhjet do të zhvillohen në 30 korrik. Thelbi që i kemi kërkuar gjykatës është që komisioni institucional i zgjedhjeve i zgjedhur në 2016 në vitin 2020 i kishte mbaruar mandati dhe duhet që rektori të inicionte një procedurë bashkë me senatin akademik për të krijuar një komision të ri zgjedhor në nivel të UT. KIZ dhe jo rektori siç e parashikon rregullorja ka shpallur fillimin e procesit zgjedhor, prandaj ne e kemi kundërshtuar në Gjykatë”.
Beteja ligjore e studentëve do të vijojë , teksa deklarojnë se nëse zgjedhjet zhvillohen fituesi i mandatit në Universitetin e Tiranës do të jetë i paligjshëm dhe vendimet e tij të pavlefshme.
“Ne do t’i drejtohemi sërish kësaj gjykatë duke i kërkuar marrjen e masës së sigurimit të padisë dhe duke i vënë në dispozicion të gjithë vendimet e paligjshme që ka prodhuar KIZ në Universitetin e Tiranës dhe që po vazhdon të prodhojë.”
Top Channel
