Putin po planifikon lëvizjen që do ta bëjë të paprekshëm!

Shumë shpejt presidentet rusë mund të fitojnë imunitet për jetë nga ndjekja penale edhe pasi të largohen nga detyra. Propozimi i ri për ndryshimin e kushtetutës, i bërë nga një grup ligjvënësish, mund ta shpëtojë Putinin nga çdo hetim edhe pasi të përfundojë mandati i tij në vitin 2024.

Kremlini nuk ka bërë ende asnjë koment mbi këtë zhvillim, megjithatë paketa e re e reformave po shihet si një mundësi që lideri rus të ruajë i pashqetësuar ndikimin e tij edhe pas lënies së presidencës. Pjesë e kësaj pakete janë edhe planet për ndryshimin e emërtimit nga kryetar shteti në lider suprem si dhe forcimin e pozitave të kryeministrit, post ky të cilin Putin mund të kërkojë ta mbajë vetë.

Iniciativat që ai ka ndërmarrë së fundi, përfshirë riformatimin e qeverisë, shihen gjerësisht si përpjekje e tij për të zgjatur qëndrimin në pushtet edhe pas katër vjetësh, kur duhet të lërë presidencën. Propozimet e grupit të punës lidhur me hetimin e kryetarëve të shtetit duhet të kalojnë edhe dy votime të tjera në Dumën ruse, përpara se të mbërrijnë në Dhomën e Lartë të parlamentit e në fund, të firmosen nga vetë shefi i Kremlinit.

Top Channel