Policia vazhdon aksionin për zbardhjen e çështjes së rrëmbimit dhe vrasjes së Jak Prengës. 49-vjeçari, u rrëmbye më datë 17 janar në Kamëz, ndërsa pak ditë më parë policia njoftoi se ai është vrarë ndërsa kërkohet trupi i tij,
Mëngjesin sotëm policia njofton se janë ushtruar kontrolle në banesa, biznese, magazina e objekte të braktisura dhe si rezultat i kontrollit janë siguruar prova të vlefshme që shërbejnë për zbardhjen dhe dokumentin e plotë të ngjarjes.
Ndërkohë që lista e të dyshuarve për rrëmbimin dhe vrasjen e Jak Prengës është shtuar, përveç 5 personave që janë arrestuar tashmë nga policia dhe pesë të tjerëve që janë në mungesë dhe që është kërkuar arrest me burg.
Policia e Tiranës
Në vijim të operacionit “Resorti”, Sektori për Krimet e Rënda në Drejtorinë Vendore të Policisë Tiranë, në bashkëpunim me Forcën e Posaçme Operacionale në Policinë e Shtetit, Forcat Speciale Renea dhe DVP Shkodër, ka vijuar kontrolle të pandërprera, me qëllim sigurimin e provave për zbardhjen dhe dokumentimin e plotë të ngjarjes mbi rrëmbimin e shtetasit J. P., të ndodhur në rrugën “London”, Kamzë, si dhe kapjen e autorëve të tjerë të përfshirë në këtë ngjarje me pasojë humbjen e jetës së shtetasit J. P.
Në këtë kuadër, në qytetin e Shkodrës dhe rrethinat e saj, mëngjesin sotëm janë ushtruar kontrolle në banesa, biznese, magazina e objekte të braktisura dhe si rezultat i kontrollit janë siguruar prova të vlefshme që shërbejnë për zbardhjen dhe dokumentin e plotë të ngjarjes.
Sektori për Krimet e Rënda në DVP Tiranë, në bashkëpunim me Prokurorinë e Tiranës, vijon veprimet për sigurimin e çdo prove të vlefshme që i shërben ngjarjes, si dhe për kapjen e personave të tjerë që janë të implikuar në këtë ngjarje.
Top Channel
