![](https://top-channel.tv/wp-content/uploads/2024/06/avione_sd-1-800x450.jpg)
Ka shkaktuar tensione në Malin e Zi miratimi i projektligjit për komunitetet fetare, i cili ka ngjallur reagimin e ashpër të opozitës pro-serbe të vendit.
Arsyet e shqetësimit të saj janë se një ligj i tillë mund t’i heqë Kishës Ortodokse Serbe të drejtën mbi pronësinë që ka. Miratimi i draftit nuk erdhi pa tensioneve. Përgjatë seancës, brenda sallës së parlamentit pati protesta të dhunshme. Në orët e para të ditës së sotme, projektligji mori dritën jeshile me shumicën e votave në mbështetje të tij, por disa anëtarë të partisë opozitare Fronti Demokratik tentuan ta pengonin procesin.
Rreth 36 deputetë e bojkotuan votimin, duke i hapur rrugën koalicionit qeverisës për ta miratuar draftin pas tetë orë debatesh të ashpra. Disa prej ligjvënësve që protestuan, u nxorën prej ndërtesës nga forcat e sigurisë, por nuk dihet nëse janë ndaluar nga policia. Një ditë më parë, qindra mbështetës të opozitës pro-serbe dolën në rrugët e kryeqytetit, Podgoricë për të kundërshtuar projektligjin.
Protestuesit i zemëron fakti që dokumenti kërkon të ofrohen të dhëna mbi pronësinë e përpara vitit 1918, kur Mali i Zi ishte I bashkuar me Mbretërinë Jugosllave. Kisha Ortodokse Serbe pretendon se ligji do t’i marrë asaj pronën, duke përfshirë manastirët dhe kishat, ndaj planifikon të ankohet pranë organizatave ndërkombëtare.
Zyrtarët malazezë e hedhin poshtë një pretendim të tillë. Madje kryeministri, Dushko Markovic u takua dhe vetë me peshkopin, Amfilohije, i cili është në krye të Kishës Ortodokse Serbe në Malin e Zi, dhe në përpjekje për të zbutur tensionet, tha se pas këtij ligji, nuk ka asnjë “axhendë të fshehtë”.
Top Channel