E duam Shqipërinë si gjithë Evropa. Ishte kjo thirrja që jehonte 29 vite më parë në cdo shesh e qytet të shqipërisë, me zanafillën në qytetin studenti.
8 dhjetori, përkujtohet dhe festohet sot si një festë kombëtare, pikërisht në nder të studentëve të dhjetorit 1990, atyre të rinjve plot aspirata dhe ideale, që së bashku me pedagogët e universiteteve të Tiranës u bënë iniciatorët e kthesës së madhe historike, që solli rënien e komunizmit dhe lindjen e demokracisë.
Me këto thirrje, studentët kërkuan ngritjen e sistemit të vlerave perëndimore dhe shtetit të së drejtës, integrimin në Europë dhe garantimin e pluralizmit politik si bazë kryesore për një shoqëri të lirë e demokratike. Në krye të studentëve, ishte Azem Hajdari, asokohe student. Më 9 dhjetor, pa iu dridhur zëri, studentët ia parashtruan kërkesat e tyre, presidentit të atëhershëm, Ramiz Alia. Protestat e studentëve vijuan dhe gjithnjë e më shumë atyre u bashkoheshin qytetarë nga e gjithë Shqipëria. E pikërisht nga qyteti studenti lindi edhe partia demokratike, partia e parë pluraliste në vend.
Protesta e studentëve të dhjetorit i dha fund epokës të gjatë të vetë-izolimit dhe sundimit ideologjik dhe i hapi rrugën ekonomisë së tregut dhe shoqërisë së hapur.
Pavarësisht se si sot vlerësohet performanca e demokracisë shqiptare, kjo lëvizje studentore shembi muret e kufijte dhe ktheu shpresat…
Në 8 dhjetor 2009, kuvendi i Shqipërisë, vendosi që kjo datë të shënohej si dita kombëtare e rinisë, pikërisht në nder të lëvizjes studentore që edhe ishte pikënisja e rrëzimit të regjimit komunist.
Top Channel
