Në kohën kur teknologjia ka bërë hapa gjigantë, duke marrë një pjesë të rëndësishme të jetës së çdo njeriu, ka ende fëmijë e të rritur që dashurojnë librin. Bibliotekat nuk janë të zbrazura.
Flavia Muça është 14 vjeç, por dashuria dhe marrëdhënia e saj me librin nisi kur ishte 5 vjeç, për të mos mbaruar kurrë.
“Kjo dashuri e imja për librin filloi që kur isha shumë e vogël, afërsisht 5-vjeçare. Prej atëherë kam pasur një marrëdhënie shumë të ngushtë me librin, e si të mos e kesh kur libri është një pasuri shpirtërore e paçmuar. Ai bën diferencën nga një njeri i thjeshtë, me një intelekt jo edhe aq të lartë, te një njeri që është i kulturuar dhe me fjalor shumë të avancuar”, shprehet Flavia Muça, nxënëse.
Në Ditën Botërore të Librit për Fëmijë, apeli bie mbi të rritur e fëmijë, por mbi të gjitha mbi prindërit për të ngjizur kulturën dhe dashurinë e përjetshme për librin.
“Familja dhe shkolla ka qenë dy nismëtarët e kësaj gjëje që nis që fëmijë, ashtu si sporti apo çdolloj hobi. Mendoj se të rinjtë duhet të fokusohen te librat”, tha Flavia Muça.
Në jetën e Flavias, teknologjia po ashtu ka zënë vend, por nuk ka arritur të zëvendësojë pjesën më të rëndësishme, atë që shpërndan kulturë dhe dije, librin.
Top Channel
