Ministri i Brendshëm, Sandër Lleshaj zhvilloi një takim paraditen e sotme me drejtuesit kryesorë të policisë së Shtetit, në ambientet e sallës së konferencave, në ministri.
Në fjalën e tij, Lleshaj u kujtoi drejtuesve të policisë se nga ora 00:00 e datës 1 Janar, veprimtaria e lojërave të fatit bëhet e paligjshme në territorin e Shqipërisë.
“Nga data 1 Janar, duke filluar nga ora 00:00, aktiviteti i lojërave të fatit bëhet i paligjshëm në Shqipëri dhe çdo pikë ku ushtrohet kjo veprimtari, duhet trajtuar njësoj si një parcelë kanabisi. Jam njohu me masat e marra nga ana juaj dhe po ju theksoj se gjithsecili do të japë llogari për zonën e tij të përgjegjësisë. Duhet të shtojmë në mënyrë të ndjeshme kontrollet dhe bashkëpunimin me qytetarët, për të luftuar ashpër këtë fenomen”, deklaroi Lleshaj.
Menaxhimi me kujdes i situatave gjatë ditëve festive, ishte një tjetër çështje që ministri i Brendshëm Sandër Lleshaj trajtoi në takimin me drejtuesit e policisë, gjatë takimit të sotëm.
“Kontrolli i zbatimit të ligjit që ndalon përdorimin e mjeteve piroteknike, si fishek-zjarret, gjatë ditëve festive, është shumë i rëndësishëm, pasi shpesh kemi hasur në raste ku janë dëmtuar rëndë përdoruesit e tyre”, deklaroi ministri.
Sandër Lleshaj përsëriti edhe njëherë urdhrin e tij, për të shmangur patrullat nëpër rrugë, nga ana e këtij shërbimi të policisë, duke kërkuar identifikimin dhe dokumentimin e shkeljeve, dhe dërgimin e gjobave me postë.
Top Channel
