Një avion i linjave ajrore gjermane ka kryer ulje të detyruar në Aeroportin e Haniasë (Chania), në ishullin e Kretës, pas informacioneve se në të ishte vendosur një bombë.
Bëhet fjalë për një “Boeing 757” të kompanisë “Condor Air”, që ishte nisur nga Hurghada e Egjiptit me 281 pasagjerë dhe pjesëtarë të ekuipazhit, me destinacion Dyseldorfin në Gjermani.
Alarmi u dha kur në tualetin e avionit është gjetur një letër që shkruante “bomb”. Kur avioni ka hyrë në zonën ajrore të Greqisë është shoqëruar nga dy avionë luftarakë “F16”, derisa ka kryer uljen e detyruar.
Pasi është ulur urgjentisht në Aeroportin e Haniasë, ai është dërguar në hapësirën mes terminalit kryesor të tij, pranë Aeroportit ushtarak të “Souda”-s, ku ndodhet baza amerikane, për t’u kryer kontrolli i duhur.
Të gjithë pasagjerët zbritën të sigurtë dhe u dërguan jashtë rrezes së zonës së sigurisë, në pritje të përfundimit të kontrollit të kryer nga forcat speciale të policisë, me ndihmën edhe të qenve të trajnuar posaçërisht për zbulimin e eksplozivëve.
I gjithë procesi u zhvillua siç parashikohej nga protokolli i sigurisë dhe, përveç hapësirës së avionit, u kontrolluan edhe të gjitha bagazhet e pasagjerëve. Alarmi rezultoi fals, pasi nuk u gjet asnjë pajisje shpërthyese, ndërkohë që pasagjerët kanë kaluar natën në aeroport dhe do të vijojnë udhëtimin këtë të premte.
Top Channel
