Kuvendi në sesionin e sherreve. Aspak konsensus, shumë konfliktualitet

Por deputetët janë paralajmëruar për mundësinë e një seance të jashtëzakonshme në gusht, me shpresën e gjetjes së një konsensusi me të paktën një pjesë të opozitës përsa i përket Shkollës së Magjistraturës, apo për plotësimin e vakancave në Gjykatën Kushtetuese.

Një indicie e dha në seancën e fundit edhe vetë Gramoz Ruçi: “Nëse do të duhet që të thërritet Kuvendi për Gjykatën Kushtetuese apo për Gjykatën e Lartë, do të thërritet”.

Edhe nëse Parlamenti rimblidhet për t’iu gëzuar një konsensusi qoftë edhe të pjeshshëm, bilanci i këtij sesioni do të ishte bindshëm në favor të konfliktit. Si një përjashtim i këtij rregulli ngjan miratimi i ligjit për vettingun në Polici që mori edhe votat e LSI-së.

Konflikti që mbizotëroi këtë sesion u paralajmërua që në mbyllje të sesionit të kaluar, kur mazhoranca votoi mes tymueseve dhe vezëve Arta Markun si Prokurore të Përgjithshme të Përkohshme.

E njëjta klimë vazhdoi me rifillimin e punimeve në janar. Protesta dhe bllokimi i foltores u bë i përjavshëm duke u kthyer në normalitet, ndërsa nuk munguan as konfrontimet.

Në drejtim të qeverisë u hodh shumëçka. Çizmja dhjetoriste e Monika Kryemadhit u pasua nga mielli, lëshimi i kartonëve, mbeti në tentativë fluturimi i ekraneve… Një herë mori zemër të kundërpërgjigjej Ditmir Bushati, por u pendua e kërkoi ndjesë.

Ky ishte sesioni parlamentar ku ndërprerjet e seancave zgjatën më shumë se vetë seancat, por opozita gjeti një formë të re komunikimi aty ku media nuk lejohej: fjalimet nga Facebook-u.

Nën regjinë e Lulzim Bashës nuk munguan as inskenimet, nga peshqit e mëdhenj te Toyota Yaris që shkarkonte milionat në Kuvend. Teatri parlamentar sfidoi kështu Teatrin Kombëtar, të cilin me ligj e çoi drejt prishjes.

Top Channel