Maqedoni, qeveria miraton në unanimitet marrëveshjen për emrin

Marrëveshja është aprovuar gjatë mbledhjes së kabinetit këtë të hënë, ndërsa tani do të kalojë në Kuvendin maqedonas, për t’u votuar edhe atje gjatë një seance plenare.

“Në seancën e 74-t, Qeveria e Republikës së Maqedonisë ka shqyrtuar dhe aprovuar projektligjin për ratifikim të marrëveshjes përfundimtare për zgjidhjen e dallimeve, siç përshkruhet në Rezolutën e Këshillit të Kombeve të Bashkuara 817 (1993) dhe 845 (1993), ndërprerje të Kornizës Kohore të vitit 1995 dhe vendosjen të partneritetit strategjik ndërmjet palëve, me propozim të Ministrisë për Punët e Jashtme. Projektligji për ratifikim do të dorëzohet në Kuvendin e Republikës së Maqedonisë”, thuhet në njoftimin e Qeverisë së Maqedonisë.

Megjithatë, mbetet e paqartë se cili do të jetë komisioni kuvendor që do të kalojë leximin e parë të projektligjit për ratifikimin e marrëveshjes përfundimtare për zgjidhjen e dallimeve me Greqinë.

“Nuk ka dilema, Komisionin e vendos kryetari i Kuvendit në bazë të projektligjit të dorëzuar, në pajtueshmëri me Rregulloren e Kuvendit”, deklaroi koordinatori i grupit parlamentar të LSDM-së, Tomislav Tuntev.

Top Channel