Përshkallëzohet situata në Lindjen e Mesme/ Izraeli sulmon Bejrutin, Hezbollahu bazat ushtarake izraelite 17/11 09:59
Një hetim i kryer nga një program televiziv i “Australian TV” sugjeron se piloti i fluturimit “370” të “Malaysia Airlines”, avion me 239 persona në bord që u zhduk mbi 4 vite më parë, mund të jetë rrëzuar qëllimisht në oqeanin Indian.
Hetuesit janë ende duke kërkuar për mbetjet e avionit, por konkluzionet e këtij paneli ekspertësh të aviacionit ngrejnë mundësinë që njëri prej mistereve më të mëdha të aviacionit të kohëve moderne mund të mos ketë qenë një aksident katastrofik, por një vrasje e mundshme masive.
Emisioni “60 Minutes Australia” mblodhi së bashku një grup ekspertësh ndërkombëtarë të aviacionit, të cilët thonë se zhdukja e “MH370” mund të jetë një akt kriminal i pilotit veteran, kapitenit Zaharie Ahmad Shah.
“Ai ka vendosur të vetëvritet. Fatkeqësisht vrau edhe këdo tjetër në bordin e atij avioni, e këtë e bëri qëllimisht”, tha hetuesi i “Canadian Air”, Larry Vance.
Ndërkohë, piloti i një “Boeing 777” dhe njëkohësisht instruktor, Simon Hardy rindërtoi planin e fluturimit bazuar mbi një radar ushtarak, e tha se kapiteni Shah fluturoi mbi vijën kufitare mes Malajzisë dhe Tajlandës, duke kaluar sa në hapësirën ajrore të njërit vend në tjetrën, për të shmangur diktimin.
“Ai e kreu kështu punën – thotë Hardy, – sepse siç e dimë dhe e pranojmë si fakt, ushtria nuk mund të vijë e të interceptojë një avion pasagjerësh”.
Hardy bëri gjithashtu edhe një zbulim të çuditshëm: Kapiteni Shah, me gjasë e zhyti krahun e avionit mbi Penang, vendlindjen e tij.
“Dikush ka qenë duke vëzhguar nga dritarja”, sugjeroi ai.
“Pse duhej që ai (piloti) të shihte hapësirën mbi Penang?”, e pyeti moderatorja Tara Brown.
“Mund të ketë qenë një lamtumirë e gjatë ose e shkurtër emocionale”, u kundërpërgjigj Hardy.
Dy prej ekspertëve të hetimit refuzuan të pranonin skenarin e Byrosë australiane për Sigurinë në Transport, sipas së cilës “rrëzimi vdekjeprurës” ndodhi pa pasur dikë në kontroll.
“Mendoj se dikush e ka kontrolluar avionin deri në sekondat e fundit”, tha Hardy.
Ata argumentuan gjithashtu se kapiteni Shah e zgjati fluturimin e “MH370”-s edhe për 115 milje të tjera, krahasuar me versionin e parë të hetuesve.
“Ka qenë mision nga një apo dy pjesëtarë të ekuipazhit për ta fshehur avionin sa më larg të mundeshin nga vendet e populluara”, thotë Hardy, duke shtuar se pikërisht kjo i detyron hetuesit të zhvendosen shumë më larg nga zona ku po kryhen kërkime aktualisht.
“CBS News” ka folur me disa prej familjarëve të viktimave të “MH370”-s, disa prej të cilëve janë shprehur se këto gjetje nuk janë aspak risi për ta, megjithatë, pa prova mjekoligjore askush nuk mund t’i bindë ata.
Familja e kapitenit Shah iu kundërpërgjigj televizionit amerikan “CBS News”, duke thënë se “drejtimi i gishtit të fajit nga piloti nuk i bën hetuesit ekspertë, por ata duhet të gjejnë avionin”. Deri më tani, “Malaysia Airlines” nuk ka komentuar mbi këtë zhvillim.
Top Channel
