Rusia sulm masiv ndaj infrastrukturës energjetike në Ukrainë/ Miliona njerëz pa energji elektrike 28/11 18:37
Emigrantët janë përleshur me policinë spanjolle në Madrid, pas vdekjes së një shitësi rruge nga Senegali, që sipas tyre ishte ndjekur nga oficerët.
Protestuesit i vunë zjarrin një motoçiklete dhe koshave të mbeturinave e qëlluan me gurë, në ngjarjen e ndodhur në Lavapies, periferi e Madridit.
Shërbimet e emergjencave thanë se, Mmame Mbage, rreth të 30-ave, ishte gjetur pa ndjenja dhe vdiq si pasojë e një ataku kardiak. “Të paktën 19 vetë u plagosën në përleshjet që pasuan, – thanë zyrtarët. – 10 oficerë policie po ashtu u lënduan”.
Përleshjet zgjatën nga ora 21 e mbrëmjes deri në orën 1:30 pas mesnate, duke u përhapur nga rruga në rrugë. Stacionet e autobusëve dhe disa degë bankash u dëmtuan.
Protestuesit thonë se Mbage kishte ardhur në Spanjë me barkë, 12 vite më parë. Ai raportohet se punonte si një shitës i paligjshëm, në rrugë, dhe i dërgonte para familjes së tij.
Policia kishte tentuar ta kapte, ndërsa ai kishte tentuar të largohej, derisa në përfundim ai kishte rënë pa ndjenja. “Gjashtë persona u arrestuan në protesta”, tha një zëdhënës i policisë së Madridit.
Ndërkohë, kryebashkiakja e Madridit tha se qyteti do të hetonte ngjarjen dhe do të reagonte sipas ligjit.
Top Channel
