Në vitin 2007, ish-Zyra Rajonale e Kthimit dhe Kompensimit të Pronave Gjirokastër, ka dhënë në favor të trashëgimtarëve të Shefki Vrenozit 581 ha tokë e zërit kadastral “pyll”, duke përfshirë edhe një pjesë të pronës shtetërore.
Ky ishte denoncimi i ardhur në redaksinë e emisionit “Fiks Fare” nga zoti Shpëtim Sadiku. Sipas tij, Hipoteka e Përmetit ka regjistruar një pronë publike si pronë private, duke prekur shtratin e lumit Lengaricë dhe banjat termike në zonën e Petranit, Përmet. Denoncuesi, Shpëtim Sadiku është ankuar në të gjitha institucionet, ku këto të fundit ia hedhin “topin” njëra-tjetrës. Pas këtij informacioni, “Fiks Fare” u njoh me vendimin e marrë dhe më pas shkoi në Hipotekën e Përmetit për të mësuar më shumë rreth këtij rasti.
“Fiks Fare” zbuloi se shkelja është bërë nga Hipoteka e Përmetit. Shkelja qëndron tek harta me të cilën është bashkëlidhur vendimi nr. 25 nga AKKP Gjirokastër, ku kanë hipotekuar 581 ha tokë, duke përfshirë edhe pronën shtetërore. Hipoteka e Përmetit, me regjistrues Arjan Kasaj, ndërtoi një hartë ndryshe nga harta pyjore e ndërtuar nga AKKP, me të cilën nuk përfshihen lumi Lengaricë dhe burimet. Sipas hartës së nxjerrë nga Hipoteka e Përmetit, rezulton se brenda sipërfaqes së trajtuar 581 ha nga dispozitivi i vendimit është përfshirë parcela nr. 90, me sipërfaqe 5 ha, e cila është dhënë në favor të trashëgimtarëve të Shefki Vrenozit, duke përfshirë Lumin Lengaricë, Burimet e Puçrave dhe Urën e Kadiut.
Z. Sadiku shprehet se në këto rrethana i është drejtuar Prokurorisë së Rrethit Gjirokastër, që konstatoi mbivendosje të pronës së regjistruar dhe pronës publike. Por, prokuroria nuk ndërmori as edhe një hap të mëtejshëm, si fillimin e një procedimi penal me arsyetimin se kjo është një marrëveshje e cila duhet të zgjidhet mes palëve. Duke harruar apo neglizhuar se pala e interesuar në këtë rast është shteti, pasi kemi të bëjmë me pronë publike.
Të kontaktuar nga gazetarët e “Fiks Fare”, regjistruesja e Hipotekës së Përmetit, Sanie Xhaferraj shprehet se kemi të bëjmë me një shkelje. Ndërsa, sipas hartografit pranë zyrës së hipotekës, Adriatik Bakushi, në momentin që prona e trashëgimtarëve Vrenozi është regjistruar, nuk duhet të kishin hyrë me sistemin e hipotekës, por me sistemin e ri të regjistrimeve, prandaj dhe ata e kanë konstatuar këtë shkelje. Sipas tij, ky problem ka nisur në vitin 2007, kur zyra e hipotekës në atë kohë ka regjistruar si pronarë familjen Vrenozi. “Faji është i shtetit që nuk ndërhyn në këtë rast dhe Avokatura e Shtetit duhet të jetë më fleksibël, më e ndjeshme dhe duhet t’i lëvizë më shumë gjërat”, shprehet hartografi.
Pas informacionit nga zyra e Hipotekës Përmet, “Fiks Fare” iu drejtua Avokaturës së Shtetit me një kërkesë. Në përgjigjen e saj thuhet se nuk është njoftuar asnjëherë nga administrata shtetërore për këtë problem. “Si Avokaturë Shteti nuk kemi asnjë indicie nga asnjë organ qendror i administratës publike për problematika që mund të jenë shkaktuar nga vendimi i pronave, apo ndonjë kërkesë për ngritjen e padisë. Për më tepër, Avokatura e Shtetit nuk vlerëson se në rastin konkret ka vend për ngritjen e padisë për sa kohë që në dispozitivin e vendimit, prona në fjalë nuk i është kthyer subjektit”, thuhet në shkresën zyrtare.
Por, nga dokumentacionet që “Fiks Fare” ka, vërtetohet se Avokatura e Shtetit është njoftuar në vitin 2013 nga Drejtoria e Shërbimit Pyjor dhe në vitin 2014 nga Hipoteka e Përmetit.
Top Channel
