Alpinistët polakë drejt majës së dytë më të lartë

K2 në malet Karakorum, përgjatë kufirit mes Kinës dhe Pakistanit, është e njohur për erërat e forta dhe shtigjet e akullta dhe shkalla e fataliteteve për alpinistët atje është e lartë. Në muajt e dimrit, reshjet e borës e bëjnë majën një kurth akulli. Më shumë se 70 persona kanë humbur jetën në përpjekje për të ngjitur majën, pjesa më e madhe e tyre në Bottlenek, ku një hap i gabuar mund të rrëzojë alpinistët në anën jugore, ku trupat ka pak gjasa të gjenden.

Sidoqoftë, alpinistët polakë janë optimistë dhe thonë se kanë shansin të bëjnë historinë. E ky është një motivim i fuqishëm për ta. Alpinistët polakë kanë shkruar një kapitull të bukur duke ekploruar majat në lartësinë e mbi 8 mijë metrave dhe ngjitja e K2 në kohë dimri, do të ishte kapitulli i fundit i këtij libri.

Ekipi përbëhet nga 13 alpinistë të kryesuar nga Kristof Uielicki, 67 vjeç, i cili në vitin 2003 kishte kryesuar një ekspeditë dimërore në K2, por që nuk kishte mundur të arrinte në nivelin e 8 mijë metrave. K2, në lartësinë e 8611 metrave, është pak më i ulët se Mali Everest.

Sidoqoftë, alpinistët polakë do ta nisin ngjitjen më 8 apo 9 janar dhe nëse do të kenë sukses pritet të kthehen në kampin bazë në mesin e marsit. Pakistani është një destinacion i pëlqyer për alpinistët. Ai rivalizon Nepalin për numrin e majave më të larta se 7 mijë metra dhe në total ka 5 nga 14 majat më të larta se 8 mijë metra në botë.

Top Channel