Vdes në spital krimineli boshnjako-kroat që piu helm në Hagë

Raportet nuk janë konfirmuar nga Gjykata Ndërkombëtare për Krimet e Luftës në ish-Jugosllavi, që la në fuqi dënimin me 20 vite burg për ish-gjeneralin boshnjako-kroat.

Seanca u ndërpre pasi i akuzuari u pa teksa gëlltiste lëngun nga një gotë, pas dhënies së vendimit përfundimtar.

Slobodan Praljak ishte një nga ish-udhëheqësit e lartë boshnjako-kroat, që kishin apeluar dënimin me 20 vite burg, dhënë në vitin 2013 për krime në Mostarin lindor.

Pasi dëgjoi konfirmimin e dënimit, 72-vjeçari u pa të gëlltiste diçka duke bërë një gjest dramatik, e i tha gjykatësit se kishte pirë helm dhe se ai nuk ishte një kriminel lufte. Gjykatësi kryesor pezulloi seancën dhe kërkoi menjëherë një mjek.

Të 6 udhëheqësit politikë dhe ushtarakë që dolën para gjykatës ishin dënuar në vitin 2013 për persekutimin, dëbimin dhe vrasjen e myslimanëve gjatë luftës në Bosnje.

Rasti është i fundit në duart e Gjykatës Ndërkombëtare Penale për ish-Jugosllavinë, e ngritur nga Kombet e Bashkuara në vitin 1993, para se ajo të mbyllë dyert muajin e ardhshëm. Javën e shkuar, gjykata dënoi ish-komandantin serbo-boshnjak, Ratko Mladiç, për gjenocid dhe krime të tjera.

Top Channel