Shqipëria, pa fonde nga IPARD/ U bllokuan nga hetimi i anti-korrupsionit të BE me akuza për vjedhje
25/11 12:15
Banka Europiane për Rindërtim dhe Zhvillim përllogarit se Shqipëria ka nevojë për 6 miliardë euro investime në pesë vitet e ardhshme për të ndërtuar një infrastrukturë si ajo e vendeve të zhvilluara.
Në raportin e fundit të tranzicionit BERZH vëren se për periudhën 2018-2022, Shqipëria duhet të investojë çdo vit 1.2 miliardë euro ose rreth 11 për qind të prodhimit kombëtar në projekte publike për të mbyllur hendekun që ka me vendet e zhvilluara.
Në vitin 2018, qeveria parashikon të investojë 655 milionë euro ose gati dy herë më pak nga sa BERZH përllogarit se janë nevojat e vendit. Kjo do të thotë se në 5 vitet e ardhshme, Shqipëria do të ketë një deficit gati 3 miliardë euro për investimet publike.
Por ku kërkohen këto investime? Sipas BERZH, gati gjysma e shifrës, pra rreth 600 milionë euro në vit duhet të shkojnë si investime në sektorin e energjisë, si në modernizimin e rrjetit të shpërndarjes ashtu dhe në ndërtimin e burimeve të reja energjetike.
Rreth 40 për qind ose 450 milionë euro në vit nevojiten në ndërtimin e rrugëve, ndërsa pjesa e mbetur duhet të shkojnë si investime për ujësjellsat dhe sektorin e teknologjisë së informacionit dhe komunikimit.
Përballë pamundësisë së buxhetit për të mbështetur investime kaq të mëdha, qeveria ka nisur një program koncesionesh me vlerë 1 miliardë euro, përmes të cilit synon të financojë projektet publike me kapital privat. Por programi është shndërruar në një temë të nxehtë të debatit politik, pasi opozita ka kërkuar ndalimin e menjëhershëm të tij duke e cilësuar si një instrument për pastrimin e parave të drogës.
Top Channel
