![](https://top-channel.tv/wp-content/uploads/2024/09/MixCollage-07-Sep-2024-05-33-PM-5997-800x450.jpg)
Emmanuel Macron ka përkujtuar këtë të shtunë, për herë të parë në cilësinë e presidentit të Francës, 11 nëntorin, ditën e armëpushimit që shënoi përfundimin e Luftës së Parë Botërore.
Sikurse e kërkon tradita, ai ka përshkuar shëtitoren Champs Elysees ku kanë qenë të vendosura trupat ushtarake franceze dhe më pas ka vendosur një kurorë me lule në varrin e ushtarit të panjohur poshtë Harkut të Triumfit.
Gjithashtu, Macron i ka bërë homazhe edhe figurës së Georges Clemenceau, kryeministri në fuqi i Francës gjatë Luftës I Botërore, i konsideruar nga qytetarët si një nga arkitektët kryesorë të paqes në botë.
Në ceremoninë përkujtimore kanë qenë të pranishëm edhe ish-presidentët Francois Hollande dhe Nicolas Sarkozy, pa harruar edhe qindra njerëz, francezë e turistë, që kanë sfiduar të ftohtin e kësaj dite.
Vitin e ardhshëm Franca do të mirëpresë përkujtimet për 100-vjetorin e Luftës I Botërore, ku do të marrin pjesë delegacione nga të paktën 80 vende.
Top Channel