U ekzekutua sot nga forcat izraelite, kush ishte udhëheqësi i Hamasit, Yahya Sinwari? 17/10 22:49
Ish-udhëheqësi katalanas, Carles Puigdemont, dhe 4 ish-ministra të tij janë lënë të lirë me kusht nga një gjykatës në Belgjikë.
Ata nuk mund të largohen nga vendi pa leje dhe duhet të japin informacione mbi akomodimin. Që të pestë zyrtarët e qeverisë së shkarkuar të rajonit rebel iu dorëzuan një ditë më parë policisë belge, pasi Spanja lëshoi një mandatarresti europian në emër të tyre.
Puigdemont udhëtoi drejt Belgjikës pasi Madridi vendosi kontrollin e tij të drejtpërdrejtë mbi Katalonjën, në vazhdën e shpalljes së pavarësisë. Ai këmbëngul të mos kthehet në vendin e vet deri në momentin që do të ketë garancinë e një procesi të drejtë e të ndershëm gjyqësor.
Aktpadia e ngritur në Spanjë për të pestë zyrtarët katalanas përfshin akuza për rebelim, copëtim të vendit dhe shpërdorim të fondeve publike. Atyre u duhet tani të paraqiten në gjykatë në Bruksel brenda 15 ditësh.
Belgjika ka maksimumi 60 ditë kohë për t’i kthyer në Spanjë, por nëse të akuzuarit nuk ngrenë pretendime ligjore, transferimi mund të ndodhë edhe më shpejt sesa kaq.
Në qytetet katalanase pati një sërë protestash të dielën, si kundër ndalimit të 8 politikanëve të hetuar për rebelim, ashtu edhe kundër prangosjes së dy aktivistëve nga autoritetet spanjolle.
Zhvillimet në Katalonjë shkaktuan krizën më të thellë politike që Spanja ka përjetuar në 40 vite, por ishin edhe një sfidë e madhe për Bashkimin Europian. E situata nuk është qetësuar ende. Mbështetësit e pavarësisë kanë bërë thirrje për demonstrata masive dhe, me shumë gjasë, do të organizojnë greva e bojkote në përgjigje të veprimeve të Madridit.
Top Channel
